Qazaqstandyq veloshabandoz «Horvatııa týrynyń» 3-kezeńinde jeńimpaz atandy
NUR-SULTAN. QazAqparat – Qazaqstandyq jas veloshabandoz Evgenıı Gıdıch «Horvatııa týrynyń» 3-shi kezeńiniń jeńimpazy atandy. Jarystar aýa raıyna baılanysty qysqartylǵan edi, dep habarlaıdy QazAqparat Sports.kz-ke silteme jasap.
«Bizdiń bul kezeńge jaqsy josparymyz bar edi, nátıjesinde bári oıdaǵydaı ótti. Shyndyǵynda, jańbyr, jel, sýyq, jarystyń toqtatylýy, sondaı-aq qaıta jalǵasýy saldarynan bul kún óte aýyr boldy. Biraq biz sport dırektorlarynyń jáne ujymnyń barlyq qyzmetkerleriniń keremet jáne úılesimdi jumysynyń arqasynda barlyǵynan úlken qıyndyqsyz óttik. Báseke qaıta bastalǵannan keıin biz jaǵdaıdy baqylap, únemi alda júrýge tyrystyq. Sońǵy kezeńde men Davıde Vılella men Andreı Zeıtske qosylyp, kóshbasshylar tobyna oraldym. Jigitter sońǵy shaqyrymdarda maǵan úlken qoldaý kórsetti, al Davıde qorytyndy shaqyrymda meni alyp shyqty. Men bul jeńisime óte rızamyn. Jeńiske jettim-aý! Barlyq joldastaryma bul aýyr ári keremet kún úshin alǵysymdy bildiremin. Bul – ortaq jeńis!», - dedi Evgenıı Gıdıch.
Úshinshi kezeń Okrýg qalasynda bastaldy, alaıda 20 shaqyrymnan keıin jarys komıssarlary kezeńdi aýa raıynyń jeldi bolýyna baılanysty ony toqtatýǵa sheshim qabyldady. Jarys biraz ýaqytqa keıinge shegerilip, Makarska qalasynan márege deıin 43 shaqyrym jerde qaıta bastaldy.
«Aýa raıy óte qaýipti boldy, sondyqtan tóreshilerdiń jarysty toqtata turyp, ornyn aýystyrý týraly sheshimderi durys edi. Biz shabandozdardy jańa jerge ákelip, jyldam 40-50 mınýtqa jattyǵý uıymdastyryp jiberdik, sondyqtan sportshylarymyz jarysty jańartýǵa tolyqtaı daıyn boldy. Biz bul maýsymnyń sońynda taǵy bir ádemi jeńiske qol jetkizgenimiz úshin rızamyz jáne osy jeńisimizdi demeýshilerimizge, sonyń ishinde, bas áriptes «Samuryq-Qazynaǵa» arnaǵymyz keledi», - dedi «Astananyń» sporttyq dırektory Sergeı ıAkovlev.
Bul jeńisiniń arqasynda Evgenıı Gıdıch «Horvatııa týrynyń» úzdikteri qataryna endi. Ol Aleks Edmondsty 6 sekýndqa, Greg Boleni 10 sekýndqa artqa tastady. Al Andreı Zeıts pen Davıde Vıllella sáıkesinshe 10 jáne 11 oryndarǵa ornalasty. «Astana» jalpy komandalyq esepte alda kete jatyr. «Horvatııa týrynyń» tórtinshi kezeńi búgin Starıgradadan Gorskı-Kotarǵa deıingi 155 shaqyrymda ótetin bolady.
