Qazaqstandyq veloshabandoz Ekvadorda jattyǵý barysynda ınsýlt aldy
ASTANA. QazAqparat - Astana Continental veloshabandozy Erlan Pernebekov Ekvadorda ótip jatqan oqý-jattyǵý jıyndary kezinde ınsýlt aldy, dep habarlaıdy Vesti.kz.
Velokomandanyń baspasóz qyzmeti habarlaǵanyndaı, 15 naýryz kúni kezekti jattyǵýlardyń birinde Erlan basyndaǵy aýrýy qatty mazalap jatqanyn aıtqan. Sportshy sol kezde birden aýrýhanaǵa jetkizildi. Tekseris kezinde Erlannyń mıyndaǵy qan tamyrlarynyń biri úzilip ketkendigi anyqtaldy. Budan keıin sportshy májbúrli túrde jasandy komaǵa engizildi.
Aıta ketý kerek, Pernebekovti komanda qataryna alý týraly sheshim úsh apta buryn qabyldanǵan. Ol kezde medıtsınalyq tekseris onyń densaýlyǵynan eshqandaı min tappaǵan bolatyn.
«Astana» komandasynyń bas menedjeri Dmıtrıı Sedýnnyń aıtýynsha, qazirgi ýaqytta komanda bapkeri Vladımır Remyga Erlannyń janynda, al onyń jeke jattyqtyrýshysy sportshynyń týǵan-týystarymen habarlasty. Olardy Ekvadorǵa jetkizý máselesi sheshilýde.
