Qazaqstandyq veloshabandoz Álem kýbogynyń ıegeri atandy
ASTANA. QazAqparat - Polshada velotrek boıynsha Álem kýbogynyń birinshi kezeńi bastaldy, onda Qazaqstan quramasy álemdik velosportta kóshbasshy ekenin taǵy bir ret dáleldedi.
«Track Team Astana» komandasynyń 25 jastaǵy sportshysy Nıkıta Panasenko álemdegi eń myqty velosıpedshilerdi basyp ozyp, upaı boıynsha jarysta jeńimpaz atandy. Bul týraly «QazAqparat» HAA Qazaqstan velosport federatsııasynyń baspasóz qyzmetine silteme jasap habarlady.
Upaı boıynsha jarystyń jalpy qashyqtyǵy 30 kılometrdi qurady. Negizgi tartys alǵashqy sátten-aq alǵa sýyrylyp shyqqan grek veloshabandozy Krıstos Volıkakıs pen Nıkıta Panasenko arasynda órbidi. Saýatty aıla-áreket qoldana alǵan qazaqstandyq sportshy qarsylasyn shań qaptyryp ketti.
Jarys nátıjesi boıynsha Volıkakıs ekinshi oryn, ıtalıan Lıam Bertatstso úshinshi oryn aldy.
Aıta keteıik, Álem kýbogynyń birinshi kezeńi 5 qarashaǵa deıin jalǵasady, Kýboktyń kelesi kezeńderi 10-12 qarashada Ulybrıtanııada, 2-3 jeltoqsanda Kanadada, 9-10 jeltoqsan aralyǵynda Chılıde jáne 19-21 qańtar kúnderi Belarýste ótedi. 2018 jyldyń 28 aqpanynan 4 naýryzyna deıin Nıderlandyda maýsymnyń basty oqıǵasy - velotrek boıynsha álem chempıonaty ótedi.
