Qazaqstandyq veb-saıttarǵa kirý tegin bolady

NUR-SULTAN. QazAqparat - Baılanys operatorlary tótenshe jaǵdaı kezinde óz abonentterine qazaqstandyq domendik aımaqta ornalasqan ınternet-resýrstarǵa qosymsha tólemsiz kirýge, tipti telefon teńgeriminde qarajat joq bolǵan jaǵdaıda da qosylýǵa múmkindik beretin túrli sheshimder men tarıftik josparlar usynýda.

Bul týraly tolyǵyraq azamattar óz baılanys operatorynan anyqtaı alady. El Prezıdentiniń TJ rejımi kezinde qazaqstandyqtarǵa qoldaý kórsetý jónindegi tapsyrmasyn baılanys operatorlarynyń oryndaý barysy týraly QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń mamandary aıtyp berdi , dep habarlaıdy QazAqparat.

Oqý oryndarynyń qashyqtan oqytý formatyna kóshýine baılanysty tnternetti tegin paıdalanýdyń mańyzy zor. Elimizdiń iri baılanys operatorlary, onyń ishinde «Qazaqtelekom» AQ, «Transtelekom» AQ, «Astel» AQ, «Kar-Tel» JShS, «Ksell» AQ, «Mobaıl Telekom-Servıs» JShS budan buryn JOO saıttaryn, elektrondyq anyqtamalyq derekter bazasyn, onlaın-kúndelik, elektrondy bilim berý portaldaryn jáne QR Bilim jáne ǵylym mınıstrligi usynǵan basqa da bilim berý resýrstaryna tegin qosylý múmkindigin usynǵan edi.

Sonymen qatar, https://www.coronavirus2020.kz/kz koronavırýs týraly resmı ınternet-resýrsyn, https://egov.kz/cms/kk elektrondyq úkimet portaly men eGov Mobile mobıldi qosymshasyn paıdalaný kezinde trafık eseptelmeıdi jáne megabaıt shegerilmeıdi.

Medıtsına qyzmetkerlerine qoldaý kórsetý maqsatynda «Ksell» AQ, «Kar-Tel» jáne «Mobaıl Telekom-Servıs» JShS koronavırýs indetine qarsy kúresip jatqan barlyq dárigerge tegin uıaly baılanys qyzmetin usyndy. Respýblıka boıynsha 20 000-nan astam medıtsına qyzmetkeri TJ kezinde uıaly baılanyspen ınternet paketin tegin paıdalanýda.

A zamattardyń epıdemıologııalyq jaǵdaıdan habardar bolýy úshin uıaly baılanys operatorlary 1406 call-ortalyǵyna uıaly telefonnan tegin qońyraý shalý múmkindigin usyndy. Azamattar atalǵan ortalyqqa qońyraý shalý arqyly mamandardan qajetti dárigerlik keńes ala alady.

«Qazaqtelekom» AQ jáne «Transtelekom» AQ TJ kezeńinde bekitilgen baılanys, Internet jáne tsıfrlyq televızııa qyzmetteri úshin tólem jasamaǵan, ıaǵnı qaryzy bar jeke tulǵalardy atalǵan qyzmetterden ajyratyp tastamaý týraly sheshim qabyldady.

TJ rejımi kezinde «Kar-Tel» JShS áleýmettik tarıftik josparyn paıdalanatyn abonentterine, ıaǵnı zeınetkerler, múmkindigi shekteýli jandar men muǵalimderge tegin baılanys jáne ınternet paketterin usynady. Sondaı-aq, barlyq uıaly baılanys operatorlary roýmıngtegi óz abonentterin bonýstyq teńgerimmen nemese áleýmettik jelilerge tegin ınternet-trafıkpen jáne týystarymen baılanysý úshin tegin messendjerlermen qamtamasyz etti.

TJ rejımi kezinde kásipkerlerge qoldaý kórsetý úshin keıbir operatorlar Internet qyzmetterine, karantınge jabylǵan saýda jáne qyzmet kórsetý oryndaryn qashyqtan baqylaý úshin beınebaqylaý qyzmetine tólem júrgizý tártibi jeńildetilgen arnaıy tarıftik josparlar ázirledi.

Qazirgi ýaqytta baılanys operatorlarynyń kúsheıtilgen jumys rejımine kóshkenin aıtyp ótken jón. Kommýnıkatsııa jelileriniń úzdiksiz jumys isteýi úshin baılanys arnalaryna táýlik boıy monıtorıng júrgiziledi. Sondaı-aq baılanys operatorlary 1414 call-ortalyǵynyń jumysyn kúsheıtý jáne memlekettik qyzmetshilerdiń qashyqtan jumys rejımine kóshýi úshin birqatar uıymdastyrý sharalaryn qabyldady.