Qazaqstandyq vaktsınanyń artyqshylyqtary qandaı

NUR-SULTAN. QazAqparat – QR BǴM bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarııa qazaqstandyq vaktsınanyń artyqshylyqtaryn aıtyp berdi, dep habarlaıdy QazAqparat tilshisi.

«Otandyq vaktsınanyń parametrleri boıynsha mynany málimdeımin: vaktsına senimdi, ýaqytsha ázirleý tehnologııasymen tekserilgen. Ondaǵy barlyq komponentter sońǵy 60 jyl ishinde zerttelgen jáne qaýipsiz. Jańa komponent – buǵan deıin aıtqanymyzdaı, SARS-CoV-2 vırýsynyń ózi. Bizdiń tehnologııamyzdaǵy vırýs hımııalyq jolmen «óltirilgen» (ınaktıvtendirilgen). Immýndyq reaktsııany kúsheıtý úshin oǵan adıývant (alıýmınıı tuzdary) qosylady», - dedi K. Zakarııa Ortalyq kommýnıkatsııalar qyzmetinde ótken baspasóz máslıhatynda.

Spıker koronavırýsqa qarsy qazaqstandyq vaktsınany ázirleýdegi tehnologııanyń artyqshylyqtaryn atady.

«Vaktsınany ázirleýdegi ınaktıvtendirilgen tehnologııanyń artyqshylyǵy –tehnologııa jyldar boıy tekserilgen, barlyq komponentter senimdi jáne qaýipsiz. Olar vaktsınamen baılanysqan aýrýlardy týdyrmaıdy jáne gýmoraldy, jasýshalyq ımmýnıtetti senimdi túrde qozdyrady. Aıyryqsha erekshelikteri – kúrdeli tehnıkany, kúrdeli tońazytqysh qondyrǵylardy talap etpeıtin jetildirilgen jetkizý ádisteri bar jáne tońazytqyshta plıýs 2-8 gradýs temperatýrada tasymaldanady», - dep túsindirdi ǴZI bas dırektory.

Sonymen birge, K. Zakarııa eki komponentpen egilgennen keıingi aǵzadaǵy antıdenelerdiń quramy boıynsha aldyn ala derekterdi baıandady.

«Klınıkalyq zertteýlerdiń birinshi jáne ekinshi fazalarynyń nátıjesi boıynsha QazCOVID-in vaktsınasyn alǵan adamdarda birinshi vaktsınadan keıin 2-den 16-ǵa deıingi tıtrde vırýsty beıtaraptandyratyn antıdenelerdiń paıda bolýy baıqalady. Ekinshi vaktsınadan keıingi deńgeı turaqty ósýde. Ortasha geometrııalyq tıtr – 99,5. Osylaısha, qazaqstandyq vaktsınanyń joǵary ımýnnostımýlıatsııalyq belsendiligin kórýge bolady», - dedi Kúnsulý Zakarııa.