Qazaqstandyq vaktsınany saldyrǵan Bilim mınıstriniń densaýlyq jaǵdaıy qalaı
«Bul – bizdiń Qazaqstan ǵalymdarynyń úlken áleýetin kórsetedi. Memleket basshysynyń tapsyrmasymen bizdiń ǵalymdarymyz óte úlken keremet jumys júrgizdi dep aıtýymyz kerek. Keıbir ýaqytta ǵalymdarymyzdyń qandaı deńgeıde ekenin túsinbeı jatamyz, anda-sanda kommentarıılerdi oqyp turamyn. Múmkin ózimiz de jetkizbeıtin shyǵarmyz. Biraq ǵalymdarymyz osyndaı keremet vaktsına daıyndap shyǵardy. Bul vaktsına óte qysqa merzimde daıyndaldy. Mamyr aıynda daıyn bolyp, klınıkaǵa deıingi zertteýler júrgizilip bitken soń, birneshe ǵalym ózderine osy ekpeni salyp, ári qaraı olardyń analızderin kórip, ekpe boıynsha esh qaýip joq ekenine kózimiz jetip otyrdy. Sondyqtan, osy jumyspen aınalysyp, kúndelikti osy aqparatty alyp júrgen soń, men de ǵalymdarymyzdy qoldaý úshin osy ekpeni ózime saldyrýǵa sheshim qabyldadym», - dep jaýap berdi Bilim mınıstri tilshi suraǵyna.
Mınıstr ekpeden keıin antıdeneler paıda bolsa da, qaýipsizdik sharalaryn saqtap júrgenin jetkizdi.
«Ekpeni tamyz aıynda aldym, ózderińiz kórip otyrsyzdar, birneshe aı ótti. Eshqandaı dene qyzýy, basqa da qıyndyqtar bolǵan joq. Immýnıtet boıynsha tıisti antıdeneler paıda boldy. Ony men Almatyǵa baryp, zertteý bolyp jatqan zerthanaǵa qanymdy tapsyrǵanda kózimiz jetti. Biraq, degenmen, osyndaı ımmýnıtet paıda bolsa da, qazirgi ýaqytta da biz sanıtarlyq talaptardy buzbaýymyz kerek. Maska taǵý boıynsha, araqashyqtyq saqtaý boıynsha barlyq talaptardy saqtap júrmin», - dedi Ashat Aımaǵambetov.