Qazaqstandyq vaktsınany saldyratyn eriktilerge aqy tólene me

NUR-SULTAN. QazAqparat – Qazaqstandyq vaktsınany saldyratyn eriktilerge eshqandaı aqy tólenbeıdi. Bul týraly QR Densaýlyq saqtaý mınıstrliginiń resmı ókili Baǵdat Qojahmetov aıtyp berdi, dep habarlaıdy QazAqparat.

«Ekpe saldyratyn eriktilerge eshqandaı aqy nemese basqa da materıaldyq syılyqtar berilmeıdi. Tek qana memleket tarapynan olardyń ómiri men densaýlyǵy saqtandyrylady. Eger ekpe salǵan erikti aýyryp qalsa nemese densaýlyǵyna basqa da zııan tıip jatsa, saqtandyrý arqyly medıtsınalyq kómek ala alady.

Eriktiler tizimin bekitý jónindegi suraqty Bilim jáne ǵylym mınıstrliginiń komıtetine joldaý kerek. Al jalpy neǵurlym kóp adam klınıkalyq tekserýden ótse, soǵurlym vaktsınanyń sapasy erterek belgili bolady», - dep jaýap berdi resmı ókil Ortalyq kommýnıkatsııalar qyzmetinde tilshi suraǵyna.

Aıta keteıik, koronavırýs ınfektsııasyna qarsy «QazCovid-in» qazaqstandyq vaktsınasynyń klınıkalyq synaǵyna qatysýǵa 627 adam ótinim bergen.