Qazaqstandyq vaktsınalardy jasaýǵa bólingen qarjy qalaı jumsaldy
NUR-SULTAN. QazAqparat – Zertteý jumystaryn júrgizý úshin aq tyshqandardan bastap makaka maımylyna deıin satyp alyndy. Bul jaıly Ortalyq kommýnıkatsııalar qyzmetinde ótken «Qazcovid-in qazaqstandyq vaktsınasy týraly» brıfıngide aıtyldy, dep habarlaıdy QazAqparat tilshisi.
«Byltyr koronavırýsqa qarsy 5 vaktsına shyǵarýǵa 1,5 mlrd teńge bólindi. Ár vaktsınaǵa osynsha bólindi dep aıta almaımyz, sebebi bul birtutas baǵdarlama. 5 vaktsınany da Bıologııalyq qaýipsizdik problemalary ǵylymı-zertteý ınstıtýty daıyndap jatyr», - dedi QR BǴM ǵylym komıtetiniń tóraıymy Janna Qurmanǵalıeva.
Onyń aıtýynsha, 1,5 mlrd teńgege aldymen qajetti reagentter satyp alyndy.
«Sondaı-aq, zertteý jumystaryn júrgizý úshin aq tyshqandardan bastap makaka maımylyna deıin satyp alyndy, sebebi bizde osylaı zertteý jumysyn júrgizýge arnalǵan janýarlardy ósiretin arnaıy oryndar joq. Vaktsınaǵa kerekti birde bir reagent elimizde óndirilmeıdi, sondyqtan shetelden satyp alyndy. Reagentter óndiretin uıymdar álem boıynsha kóp emes. Búkil álemdegi ǵylymı uıymdar reagent óndiretin uıymdarǵa kezekke turady. 1,5 mlrd teńgeniń ishine ǵalymdardyń jalaqysy da kiredi, sonymen qatar zertteý jumysyna qajetti basqa da zattar satyp alyndy. Kerekti qurylǵylarǵa 800 mln teńgeden astam qarajat bólindi. Olar basqa bıýdjettik baǵdarlama boıynsha satyp alyndy», - dep atap ótti Janna Qurmanǵalıeva.
