Qazaqstandyq vaktsınadan keıin antıdene qansha ýaqyt saqtalady

NUR-SULTAN. QazAqparat – QR Bilim jáne ǵylym mınıstrligi Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa qazaqstandyq vaktsınadan keıin antıdene qansha merzim saqtalatyny týraly suraqqa jaýap berdi, dep habarlaıdy QazAqparat tilshisi.

Spıkerge «Spýtnık-V» vaktsınasy aǵzaǵa vırýsty eki jylǵa deıin jolatpaıdy. ıAǵnı, eki jyl boıy antıdene qalyptasady dep jatyr. Al «QAZVAC» kúshi qansha ýaqytqa jetedi?» degen suraq qoıyldy.

«Spýtnık-V» eki jyl ımmýndyq jaýapty ustap turýy úshin eki jyl boıy ony tekserý kerek. Búgingi kúni bul zertteýlerdiń júrgizilgenine tek qana bir jyl boldy. Sondyqtan, ony naqty aıtý qıyn. Bizdiń vaktsınamyz týraly tolyq aqparatty klınıkalyq zertteýdiń úshinshi fazasy aıaqtalǵan soń aıta alamyz. Degenmen eń basynda ǵalymdardyń ózi vaktsına salǵan sátten beri toǵyz aı ótti. Toǵyz aıdyń ishinde ımmýndyq jaýap joǵary bolyp tur», - dep jaýap berdi K. Zakarııa Ortalyq kommýnıkatsııalar qyzmetinde ótken baspasóz máslıhatynda.

Buǵan deıin QR Bilim jáne ǵylym vıtse-mınıstri Mıras Dáýlenov eriktilerdiń klınıkalyq zertteýi qalaı ótip jatqanyn aıtyp bergen edi.

Sonymen birge, Bıologııalyq qaýipsizdik máseleleri ǵylymı-zertteý ınstıtýty janýarlardyń koronavırýsyna qarsy vaktsına ázirleýdi josparlap otyr.

Vaktsına ázirlep jatqan Bıologııalyq qaýipsizdik problemalary ǵylymı-zertteý ınstıtýty ǵalymdarynyń eńbekaqysyn kóterýge qarajat bólindi.