Qazaqstandyq vaktsına shyǵarý qandaı kezeńde tur – Mınıstr jaýaby

NUR-SULTAN. QazAqparat – Qazaqstandyq vaktsına klınıkalyq synaqtyń úshinshi kezeńinen ótip jatyr. Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.

«Qazirgi ýaqytta qazaqstandyq vaktsına jasalyp qoıdy. Ol klınıkalyq synaqtyń úshinshi kezeńinen ótip jatyr. 3 000 erikti vaktsına qabyldady. Arada 21 kún ótkennen keıin ekinshi márte qabyldaıdy. Bul zertteý jumysy anonımdi túrde júzege asýda», - dep atap ótti QR Densaýlyq saqtaý mınıstri Alekseı Tsoı.

Ol memlekettik qyzmetkerlerdiń birqatary vaktsına qabyldaǵanyn aıtty.

«Qandaı memlekettik qyzmetkerler vaktsına qabyldaǵanyn ózderińiz de bilesizder. Olardyń arasynda Memleket basshysynyń kómekshisi Erlan Qarın jáne Jambyl oblysynyń ákimi Berdibek Saparbaev bar», - deıdi ol.