Qazaqstandyq vaktsına ázirlegen ǵalymdardyń jalaqysy kóterilip, baspana beriledi

NUR-SULTAN. QazAqparat – QR Bilim jáne ǵylym mınıstrligi ǵylym komıtetiniń tóraıymy Janna Qurmanǵalıeva vaktsına ázirlep jatqan Bıologııalyq qaýipsizdik problemalary ǵylymı-zertteý ınstıtýty ǵalymdarynyń jumys jaǵdaıyn aıtyp berdi, dep habarlaıdy QazAqparat tilshisi.

«Ǵalymdardyń eńbekaqysyn kóterýge qarajat bólindi. Respýblıkalyq bıýdjet komıssııasy jaqynda ótti jáne bul sharany qoldady. Instıtýttyń ǵylymı qyzmetkerleriniń ortasha jalaqysy 325 myń teńgeden bastalady. Ákimshilik jáne qyzmet kórsetý personalynyń jalaqysy 250 myń teńgege deıin bolady», - dedi J. Qurmanǵalıeva Ortalyq kommýnıkatsııalar qyzmetinde ótken baspasóz máslıhatynda.

Ol bıologııalyq qaýipsizdikti qamtamasyz etý máselelerin ǵylymı zertteýge 2022-2024 jyldary 2,8 mıllıard teńge (jylyna mıllıard teńgeden) bólingenin atap ótti.

«Instıtýt janynda ǴZI qyzmetkerlerine arnalǵan úsh úı, jalpy kólemi 180 páter salynyp jatyr. Jýyrda ǵana osy 180 páterge turmystyq tehnıka, jıhaz jáne ózge de jabdyqtar satyp alýǵa respýblıkalyq bıýdjetten 293 mıllıon teńge bólindi. Bizdiń ǵalymdar men ınstıtýt qyzmetkerleri osy páterlerge kirgende jaıly ómir súrý úshin barlyq qajetti zattarmen qamtamasyz etiledi», - dep atap ótti J.Qurmanǵalıeva.