Qazaqstandyq vagondardy shetelge eksporttaýymyz kerek - Máýlen Áshimbaev
«Jalpy, «Tulpar-Talgo» zaýyty búgingi tańda Qazaqstannyń temir jolyn jańa vagondarmen qamtamasyz etip otyr. Óndiriste birshama vagondardyń shyǵarylyp jatqanyn kórip otyrmyz. Ózderińiz biletindeı, Qazaqstan aýmaǵy boıynsha álemde toǵyzynshy oryn alady. Bizdiń ekonomıkany damytyp, halyqtyń áleýmettik jaǵdaıyn qamtamasyz etip, qaýipsizdigimizdi saqtaý úshin kólik júıesi men kommýnıkatsııany damytýdy ózimizge negizgi maqsat etip qoıýymyz kerek. Búgingi kúni elimizde naqty osy saıasat júzege asyrylyp jatyr. Osy saıasattyń negizinde Qazaqstandaǵy joldardy, temir joldardy salý negizgi basymdyqtardyń biri bolyp tabylady», - deıdi májilismen «Tulpar-Talgo» zaýynyń jumysymen tanysý barysynda.
Parlament Májilisi depýtatynyń aıtýyna qaraǵanda, Qazaqstanda «Nurly jol» baǵdarlamasy aıasynda joldar, temir joldarmen birge logıstıkalyq ortalyqtar da salynýda. Sondyqtan, Qazaqstandy damytýdyń birden-bir faktory - Qazaqstandaǵy temir joldardy damytý bolyp tabylady.
«Sońǵy jyldary elimizde birshama temir jol salynyp jatyr. Ony damytýdyń bir amaly - eskilerin jańa vagondarǵa aýystyrý. «Tulpar-Talgo» zaýytynda eýropalyq talaptar eskerilip otyr. Shyǵarylyp jatqan vagondardyń barlyǵynyń sapasy óte joǵary. Qazirgi ýaqytta mundaǵy vagondardy álemdik standarttarǵa saı keledi dep aıtsaq artyq aıtqanymyz emes», - deıdi depýtat.
Máýlen Áshimbaev aldaǵy ýaqytta «Tulpar-Talgo» ózin-ózi ustap turýy úshin eksporterlarmen qyzý jumys júrgizýdi qolǵa alýy kerektigin aıtady.
«Osy óndiristiń aldaǵy úlken maqsattardyń biri - Qazaqstandaǵy eski vagondardy aýystyrýmen birge, shetelderge, atap aıtqanda, Orta Azııa memleketterine, Iranǵa ózimizdiń vagondarymyzdy shyǵarý. Kásiporynnyń aldynda turǵan birden-bir úlken maqsattyń biri osy bolyp otyr. Óıtkeni, Qazaqstandaǵy ishki suranys qalaı da bolsa 2025 jylǵa deıin qamtamasyz etiledi. Biraq, kásiporyndy ary qaraı ustap turý úshin Ózbekstanǵa, Orta Azııa memleketterine, Iranǵa, Aýǵanstanǵa vagondardy shyǵarýdy qolǵa alýymyz kerek», - deıdi Máýlen Áshimbaev.
Májilismen bul baǵytta birshama jumys qolǵa alynǵanyn aıtyp berdi.
«Atap aıtqanda, Ózbekstanmen qarym-qatynastyń jandanyp kele jatqanyna baılanysty «Tulpar-Talgo» zaýytynyń vagondaryn eksportqa shyǵarý týraly kelisimder jasalyp jatqan sııaqty. Iranmen de bul baǵytta jumys bastalǵan sekildi. Vagondardy basqa memleketterge jiberip, ózimizdiń eksporttyq áleýetimizdi arttyramyz degen oıdamyn. Sondyqtan, búgingi kúni depýtattarmen birge kásiporyn basshylyǵymen kezdesip, qandaı máselelerdiń bar ekeni talqylap jatyrmyz», - dep túıdi Máýlen Áshimbaev.
