Qazaqstandyq uıaly baılanys naryǵynda tórt operator jetkilikti - Kólik jáne kommýnıkatsııa vıtse-mınıstri S.Sársenov
ASTANA. 15 mamyr. QazAqparat - Tutynýshylardyń suranysyn qamtamasyz etý úshin qazaqstandyq uıaly baılanys naryǵyna tórt operator jetkilikti.
Bul týraly QR Kólik jáne kommýnıkatsııa vıtse-mınıstri Sáken Sársenov málim etti, dep jazady Primeminister.kz.
«Bizdiń elimiz aýmaǵy boıynsha óte aýqymdy, biraq halyqtyń tyǵyzdyǵy óte tómen, osyǵan baılanysty qazir uıaly baılanys naryǵyndaǵy operatorlar - Kcell, Beeline, Tele-2, ALtel naryqty qamtamasyz etýge, halyqtyń suranysyn qanaǵattandyrýǵa jetkilikti dep sanaımyz», - dedi S.Sársenov.
Sonymen qatar, ol «taıaý arada jańa operatorlar bolmaıdy, oǵan qosa biz ondaı oıynshylardy kórip otyrǵan joqpyz» dep atap ótti.
Onyń paıymdaýynsha, qazirgi kompanııalar arasyndaǵy básekelestikti arttyrýǵa basa nazar aýdarý kerek.
Vıtse-mınıstr oǵan qosa úsh jyldyń ishinde ınterkonnekt (jeliler arasyndaǵy qońyraýlar quny) tarıfteri birte-birte tómendeı beretinin aıtty.
«Tele-2 jáne ALtel operatorlary óziniń qyzyqty usynystarymen tarıfterdiń tómendeýine yqpal etedi. Menińshe, bul da jaqyn arada básekelestiktiń artýyna áser bolmaq», - dep atap ótti vıtse-mınıstr.
ComNewsResearch taldaý agenttiginiń málimetinshe, 2013 jyldyń aqpanyna Qazaqstannyń eń arzan operatory TELE-2 bolyp tabylady: operatordyń usynysy boıynsha «qorjynnyń» ortasha quny respýblıkanyń barlyq oblystarynda 1093,86 teńgeni quraıdy, bul Qazaqstan boıynsha ortasha kórsetkishten (1932,26 teńge) 43%-ǵa tómen. Odan keıin «KaR-Tel» kompanııasy Veeline brendimen birge: 1855,55 teńge.
Reıtıngte qarastyrylǵan operatorlar ishinde eń qymbaty Kcell brendimen «Ksell» AQ bolyp tabylady. Onyń uıaly baılanys «qorjyny» 2270,93 teńge deńgeıinde tirkelgen, bul el boıynsha ortasha esepten 16%-ǵa artyq. Kompanııanyń basqa bir brendi Activ «qorjyn» qunynyń ortasha esebinen ne bary 6%-ǵa joǵary.
Qazirgi ýaqytta Qazaqstannyń uıaly baılanys naryǵynda Kcell, Beeline, Tele 2, ALtel brendterimen 4 operator jumys jasaıdy. Oǵan qosa naryqtyń 80%-dan astamy Kcell jáne Beeline tıesili.
