Qazaqstandyq ustaz «sóıleı» alatyn qalam oılap tapty
ASTANA. QazAqparat - Ulaǵatty ustaz tálim-tárbıe bergen shákirtiniń bolashaǵyna alańdaıdy. Árqaısysy ómirden óz ornyn adaspaı tapsa deıdi. Ol úshin rýhanı tárbıe men aǵartý jumysynyń qaz-qatar júrgenin qalaıdy.
Osyndaı ulaǵatty ustazdyń biri - búginde jas mamandarǵa ónege kórsetip júrgen Bıjan Igenbaeva. Besik jyryn qońyr únmen shyrqap turǵan Bıjan apaıdyń qolyndaǵy qalamnyń «sóıleı» alatyn qabileti bar. Qurylǵyny qosyp, kitaptyń muqabasynda kórsetilgen tańbaǵa jaqyndatsańyz, onyń ishindegi mátindi qulaqqa jaǵymdy daýyspen oqyp, án salatynyna kóz jetkizýge bolady. Tipti dombyra men qobyzdyń únin de estısiz. Bul dúnıeni jasap shyǵarý úshin avtor 3 jylǵa deıin memlekettik qyzmetten bas tartqan. Nátıjesinde 12 kitaptan turatyn «Danalyq álippesi» atty tárbıelik qural kesheni jaryq kórdi. Al álippeniń mańyzdylyǵyn Elbasy alǵysóz retinde bildirgen.
«Besik jyrynan keıin adam balasyna ne kerek? Ertegiler kerek, ertegiden keıin ańyzdar, ańyzdardan keıin ádemi áńgimeler, tárbıeleıtin Altynsarınnyń jınaqtaǵan áńgimeleri. Odan keıin naqyl sózder, maqal-mátelderdi «atalar sózi» dep berdik», - deıdi QR BǴM Mektepke deıingi balalyq shaq respýblıkalyq ortalyǵynyń dırektory Bıjan Igenbaeva.
Pedagogtyń bul ázirge sońǵy jumystarynyń biri ári ınnovatsııany qoldana otyryp shyǵarǵan jınaǵy. Bıjan Qurmanǵalıqyzynyń úzdiksiz izdenisiniń arqasynda 1991 jyly respýblıkanyń barlyq mektepterinde «fonohrestomatııa» dep atalatyn muǵalimderge qalaı mánerlep oqý kerektigin úıretetin qural shyqty. Álippe, Ózin-ózi taný, Ana tili hrestomatııasy, Adamgershilik sabaqtary, Men adammyn syndy basqa da oqý-baǵdarlamalyq eńbekteri jáne bar.
« Az ýaqyttyń ishinde maǵan múmkindik týdy bastaýysh synybynyń muǵalimi bolýǵa. Sol sátten bastap «bilim negizi bastaýysh synypta eken ǵoı, endeshe men osy ǵylymnyń basyn izdeıin» dep bastaýysh synyptyń muǵalimi bolýǵa tyrystym. Nátıjesinde osy álippe dúnıege keldi», - deıdi maman.
Ustazdyń táýelsizdik jyldary tól oqýlyqty shyǵarýǵa atsalysqany men tynymsyz izdenisi nazardan tys qalǵan joq. QR Bilim berý isiniń úzdigi ataǵymen, Jas urpaqty oqytý jáne tárbıeleý isindegi eleýli tabystary úshin Y.Altynsarın medalimen jáne Qazaqstan halqy Assambleıasynyń 20 jyldyq medalimen marapattalǵan,.dep jazady 24.kz.
