Qazaqstandyq ushqyshtar alǵash ret parashıýtpen sýǵa sekirýdi oryndady - QR QM
Ushqyshtar birinshi ret parashıýtpen sý betine sekirýdi oryndap, sý tasqynynan keıin qysyltaıań tirshilik jónindegi is-qımyldy pysyqtady, dep habarlaıdy QR Qorǵanys mınıstrliginiń baspasóz qyzmeti. Sýǵa parashıýtpen sekirýdiń ózindik erekshelikteri men qıynshylyqtary bar. Ushqysh ózinen talap etiletin joǵarǵy moraldyq-jigerlik jáne psıhologııalyq qasıetter, tártip, barlyq qaýipsizdik sharalary jónindegi daıarlyq jáne ony saqtaı bilýi sııaqty birneshe faktorlar kesheni boıynsha synalady. «Bizdiń ekıpajdar Kaspıı teńizinen, Balqash kólinen jáne basqa da qazaqstandyq sý qoımalarynan ushyp ótedi. Sýǵa sekirý jattyǵýlary jaýyngerlik daıarlyq kýrsynda qarastyrylǵan. Atalǵan jattyǵýlar ushqyshtarǵa ushý aparattaryn tastap ketý májbúrligi kezinde qutqarý quraldaryn paıdalaný daǵdylaryn pysyqtaıtyn bolsa, al izdestirý-qutqarý jáne parashıýttik-desanttyq qyzmet mamandary apatty basynan ótkergen adamdardy kóshirý kezindegi qajetti mindetterdi oryndaıtyn bolady», - dedi QR QK ÁQK ÁÁK izdestirý-qutqarý jáne parashıýttik-desanttyq qyzmettiń bastyǵy maıor Erjan Ábdikov. Sodan keıin ushqyshtar apattan keıingi is-qımyl algorıtmin, ózderiniń ornalasqan jerin anyqtaý, jaryq dabyly quralyn paıdalaný, jerlerdi búrkemeleý jáne qarsylastyń izine túsýde alǵa ilgerileýdi oryndaý jumystaryn pysyqtady.