Qazaqstandyq ushqyshsyz ushý apparattary eksportqa shyǵarylady

NUR-SULTAN. QazAqparat - «Qazaqstan Injınırıng» UK» AQ Serbııanyń «YUGOIMPORT-SDPR» kompanııasymen ózara yntymaqtastyq týraly kelisimge qol qoıdy, dep habarlaıdy QazAqparat QR Indýstrııajáne ınfraqurlymdyq damý mınıstrliginiń baspasóz qyzmetine silteme jasap.

Kelisimge oraı otandyq ushqyshsyz basqarylatyn ushý apparattary atalǵan memlekettiń naryǵyna shyǵarylmaq.

Sondaı-aq Kelisim elder arasyndaǵy áskerı tehnıkalyq quraldardy birlese óndirý boıynsha birqatar ýaǵdalastyqtardy qamtıdy. Onyń ishinde zamanaýı áskerı qarý-jaraq túrlerin shyǵarý, qorǵanys-ónerkásip kesheni salasyndaǵy eń jańa álemdik standarttar men praktıkalardy engizý kózdelgen.

Basqosýǵa QR Indýstrııa jáne ınfraqurylymdyq damý mınıstri Qaıyrbek Óskenbaev, ulttyq jáne sheteldik kompanııa ókilderi, sondaı-aq jaýapty uıym basshylary qatysty.

«Qazaqstandyq ónimniń álemdik naryqqa shyǵýy bizge úlken múmkindik beredi. Sonymen qatar suranystyń bolýy – qazaqstandyq ónimniń sheteldik óndirýshilermen básekege túse alatyndyǵynyń aıqyn kórsetkishi dep sanaımyn. Aldaǵy ýaqytta osy taraptaǵy áriptestigimizdi arttyra túsetin bolamyz», – dep atap ótti QR IIDM basshysy.

«Qazaqstan Injınırıng» UK» AQ Basqarma tóraǵasy Temirjan Ábdirahmanovtyń aıtýynsha, aldaǵy ýaqytta Qazaqstan men Serbııa kásiporyndary 82 jáne 120 mm kalıbrli zymyran-artıllerııalyq oq-dáriler men mınometterdi birlesip óndirmek.

«Bizdiń kompanııa úshin bul damýdyń mańyzdy kezeńi. Sheteldik naryqtarǵa shyǵý – bul bizge ózimizdi tanytýǵa, óndiristi keńeıtýge, basqa elderdiń satyp alý áleýetin paıdalanýǵa jáne salany damytýǵa múmkindik beredi», – dedi T. Ábdirahmanov.