Qazaqstandyq úsh sportshy erler arasyndaǵy qol kúresinen Álem chempıondary boldy

Qol kúresinen erler arasyndaǵy alǵashqy Álem chempıonaty ústimizdegi jylǵy 26-28 naýryz kúnderi aralyǵynda Máskeý qalasynda ótti. Chempıonatqa ártúrli elderden kelgen 130 sportshy qatysty (barlyǵy 23 komanda).

Qazaqstannyń sportshylary baıraqty dodada namysty qoldan bermeı, úlken sheberlikterin kórsete aldy. Nátıjesinde, Respýblıkalyq «Ulan» gvardııasynyń áskerı qyzmetkeri Rýslan Muhambaev (70 keli salmaq dárejesinde), QR Prezıdenti Kúzet qyzmetiniń qyzmetkeri Ernar Myrzaǵalıev (75 kelige deıingi salmaq dárejesinde) jáne Ulttyq qaýipsizdik komıtetiniń qyzmetkeri Rýslan Aýshev (95 kelige deıingi salmaq dárejesinde) altynnan alqa taǵynyp qaıtty.

Sondaı-aq QR Prezıdenti Kúzet qyzmetiniń qyzmetkerleri Áset Tóleýov (60 kelige deıingi salmaq dárejesinde) pen Mardan Buzdaev (65 kelige deıingi salmaq dárejesinde) jáne Ońtústik Qazaqstan oblysynyń sportshysy Bekzat Bektemirov (80 kelige deıingi salmaq dárejesinde) qorjynǵa bir-bir qoladan saldy.

Respýblıkalyq gvardııadan málim etkendeı, Álem chempıony atanǵan serjant R.Muhambaev, Ulttyq gvardııaǵa áskerı qyzmetke kelgeli beri óziniń sheberligin aıtarlyqtaı shyńdap úlgergen. Máselen, ol Qol kúresinen álem kýbogynda (Fıladelfııa, AQSh) - úshinshi oryn, Qol kúresinen reseılik halyqaralyq týrnırde (Máskeý qalasy, Reseı) - ekinshi oryn, Respýblıkalyq gvardııa qolbasshysy kýbogynda (Astana qalasy) - birinshi oryn jáne Qaza bolǵan quqyq qorǵaý organdary qyzmetkerlerin eske alýǵa arnalǵan halyqaralyq týrnırde (Tashkent, Ózbekstan) - úshinshi oryndy ıelendi.

Atalmysh sport túrinen qazaqstandyq sheberlerdiń halyqaralyq deńgeıdegi túrli jarystarǵa qatysýy, Elbasynyń qyzý qoldaýynan múmkin bolyp otyr. Qazaqstanda qol kúresimen jáne sporttyń basqa túrlerimen aınalysýǵa barlyq jaǵdaılar jasalǵan. «Respýblıkalyq «Ulan» gvardııasynyń qolbasshysy general-leıtenant Abaı Tasbolatov ta, sheberlikterin arttyrýǵa talpynǵan áskerılerge jan-jaqty qoldaý bildirip, jaǵdaılar jasaýda», - dep atap ótti Respýblıkalyq gvardııanyń Tárbıe jáne áleýmettik-quqyqtyq jumys bóliminen.