Qazaqstandyq úsh samboshy álem chempıonatynyń júldegeri atandy
ASTANA. QazAqparat - Reseıdiń Sochı qalasynda erler men áıelder arasynda sambodan ótip jatqan álem chempıonatynyń alǵashqy kúninde qazaqstandyq sportshylar da júldege ilikti, dep habarlaıdy «QazAqparat» tilshisi.
Halyqaralyq sambo federatsııasynyń saıtynan alynǵan málimetke qaraǵanda, álem chempıonaty men álem kýbogy jarystarynda talaı ret top jarǵan Beıimbet Qanjanov 52 kg salmaqta bul joly qola júldeni qanaǵat tutty. Sol sekildi Álibek Zekenov 90 kg salmaqta jáne áskerı sambodan Raıhan Mádı 100 kg salmaqta úshinshi orynǵa kóterildi.
Dúnıe júziniń 86 elinen tańdaýly samboshylar qatysyp jatqan aıtýly dodanyń birinshi kúni Reseı quramasy alty birdeı altyn medaldi jeńip aldy. Sonyń ishinde Marııa Molchanova 48 kg salmaqta úsh dúrkin álem chempıony atandy.
Aıta keteıik, búgin 52, 64, 80 kg (áıelder), 57, 74, 100 kg (erler), 62, 82, +100 kg (áskerı sambo) salmaq dárejeleri boıynsha jeńimpaz-júldegerler anyqtalady.
