Qazaqstandyq úsh marafonshy Azııa chempıonatyna qatysady
ASTANA. QazAqparat - Marafonnan Qytaıdyń Dýngýan qalasynda ótetin Azııa chempıonatyna qazaqstandyq úsh marafonshy qatysady, dep habarlaıdy QazAqparat tilshisi.
QR Jeńil atletıka federatsııasynyń habarlaýynsha, 26 qarasha kúni bastalatyn dodada 15 eldiń sportshylary baq synaıdy.
Uıymdastyrýshylar taratqan málimetke sáıkes qazirge deıin 22 er, 15 áıel marafonshynyń qatysatyny naqtylanǵan. Olardyń úsheýi qazaqstandyq sportshylar.
Dýngýanda Alekseı Gýsarov (Almaty), Dana Aıdosova (Almaty) jáne Gúljanat Janatbek (Almaty oblysy) óner kórsetedi.
Almatylyq Alekseı Gýsarov pen Dana Aıdosova bapkeri Sorokıvskıımen birge Ystyqkólde eki oqý-jattyǵý jıynyn ótkizdi. Al Gúljanat Janatbek reseılik maman Lılııa Shobýhanyń qaramaǵynda daıyndaldy.
Osy úsheýiniń arasynda marafonǵa júgirýden tek Gúljanattyń ǵana tájirıbesi bar. Gýsarov buǵan deıin orta qashyqtyqqa júgirýden óner kórsetken, Aıdosova, tipti, sporttyq júriske mamandaǵan atlet. Biraq jaqynda ekeýi de uzaq qashyqtyqqa júgirýdi tańdady.
Aıta keteıik, marafonnan Azııa chempıonatynan birinshi orynǵa ıe bolǵan sportshyǵa 10 myń, ekinshi orynǵa 5 myń, úshinshi orynǵa 3 myń dollar kóleminde syıaqy taǵaıyndalǵan.
Foto kazathletics.kz
