Qazaqstandyq úsh fýtbolshy Tájikstan klýbyna aýysty
ASTANA. QazAqparat - Tájikstan chempıonatynyń Joǵary lıga klýby «Istravshan» óziniń quramyna qazaqstandyq úsh fýtbolshyny shaqyrdy, dep habarlaıdy SIA «SPORTINFORM» SAA.
19 jastaǵy qaqpashy Ahan Dergancheev, 27 jastaǵy shabýyldaýshy Sergeı Shabalov jáne 24 jastaǵy jartylaı qorǵaýshy Vıacheslav Hrıstıch tájikstandyq komandada synnan ótip, «Istravshan» klýbynyń oıynshysy atandy.
Bul oıynshylardyń eshqaısysy kásipqoı sportshy emes. Olardyń ekeýi sońǵy ýaqytqa deıin balalar jattyqtyrýshysy retinde jumys istedi. Dergancheev «Eńbek» fýtbol mektebiniń tálimgeri. Ol tek Almatyda ótken chempıonatta ǵana áýesqoı oıynshy retinde óner kórsetken. Shabalov bolsa, «Almaty» fýtbol mektebiniń bapkeri bolǵan. Hrıstıch balalalar men jasóspirimderge arnalǵan №2 mektepte jattyqtyrýshy boldy.
«Istravshan» klýbynyń prezıdenti Almatyǵa bapkerlerdiń semınarlarynyń birine kelgen. Jıynnan soń estrada juldyzdary men bapkerler arasynda joldastyq kezdesý uıymdastyryldy. Úsh oıynshy da bapkerler komandasynda oınap, tájik fýtboly ókilderiniń kózine túsken.
