Qazaqstandyq úsh boksshynyń promoýterlik kompanııasy jumysyn qaıta bastady

NUR-SULTAN. QazAqparat – Koronavırýs pandemııasyna baılanysty úzilis alǵan «Eye of the Tiger Management» kanadalyq promoýterlik kompanııa boks keshterin uıymdastyrýdy qaıta bastady. QazAqparat bul týraly VKontakte áleýmettik jelisindegi «Qazaqstannyń kásipqoı boksy» paraqshasyna silteme jasap habarlaıdy.

«Bizde jaqsy jańalyq: Bokstasýdy qaıta bastaımyz. Iá, biz oraldyq!», - promoýterlik kompanııanyń Instagram-akkaýntynda.

«Eye of the Tiger Management» shoýlarynyń taıaý ýaqyttaǵy datalary ázirge belgisiz.

Eske salaıyq, atalmysh kompanııa jeńilip kórmegen qazaqstandyq úsh boksshymen jumys isteıdi – Batyr Júkembaev (18-0, 14KO), Sadrıddın Ahmedov (11-0, 10KO) jáne Nurzat Sabyrovpen (11-0, 9KO).

Pandemııa bastalǵanǵa deıin bıyl óz jekpe-jekterin Júkembaev pen Sabyrov ótkizip úlgerdi. Birinshisi meksıkalyq qarsylasy Rıkardo Larony (22-8, 10KO) ekinshi raýndta nokaýtqa túsirse, Sabyrov Meksıkanyń ózge ókili Rıkardo Floresti (22-8-1, 14KO) tóreshilerdiń biraýyzdy sheshimimen jeńdi.