Qazaqstandyq úsh boksshy qyz Serbııadaǵy týrnırdiń fınalyna shyqty
NUR-SULTAN. QazAqparat - Qazaqstandyq úsh boksshy áıelder arasyndaǵy «Ulttar kýbogi» halyqaralyq týrnıriniń fınalyna shyqty, dep habarlaıdy Olympic.kz.
Serbııada áıelder arasyndaǵy «Ulttar kýbogi» halyqaralyq básekesiniń alǵashqy fınalısteri anyqtaldy. Jartylaı fınaldyq kezdesý nátıjesi boıynsha úsh qazaqstandyq boksshy fınalǵa joldama aldy. 60 kelide Rımma Volosenko jartylaı fınalda túrkııalyq qarsylasyn jeńip, fınalǵa shyqty. Al 81 keliden joǵary salmaqta Lázzat Kúngeıbaeva chehııalyq sportshydan basym tústi.
Aıta keterligi, 81 kelige deıingi salmaq dárejesinde Gúlsaıa Erjan jerebe nátıjesi boıynsha avtomatty túrde fınalıst atanǵan bolatyn. 69 keli salmaq dárejesinde sharshy alańǵa shyqqan Valentına Halzova jartylaı fınalda túrkııalyq álem chempıony Býsenaz Sýrmenelıge jol berip, jarystyń qola júldesine ıe boldy.
Búgin Qazaqstan quramasynyń sportshylary, atap aıtqanda, Araılym Marat, Dına Jolaman jáne Vladıslava Kýhta fınaldyq joldamany sarapqa salady.
