Qazaqstandyq Úndistannan tyrysqaq juqtyryp keldi
ALMATY. QazAqparat - Almatyda Úndistanǵa demalýǵa barǵan taǵy bir er adam tyrysqaq aýrýyn juqtyryp keldi, dep habarlaıdy QazAqparat tilshisi.
Qalalyq Qoǵam densaýlyǵyn qorǵaý departamentiniń mamandarynyń aıtýynsha, 5 adamnyń barlyǵy Úndistannyń Goa shtatynda demalyp kelgen.
35 jastaǵy er adam shetelge óziniń dosymen birge barǵan. Qazaqstandyqtar Úndistanda júrgende-aq densaýlyqtary syr bere bastaıdy.
Aıtýlarynsha, olar sergitkish sýsyn iship, jaǵajaıda demalǵan. Shıki teńiz ónimderimen jegen.
«Qazir er adam juqpaly aýrýlar aýrýhanasynda em qabyldap jatyr. Patsıenttiń beti beri qarady. Onyń qasyndaǵy joldasynda dıagnoz rastalmady», - dedi departamenttiń Asa qaýipti jáne karantındi juqpalarǵa epıdemıologııalyq qadaǵalaý júrgizý bóliminiń basshysy Saıat Qaýmetbaev.
Onyń aıtýynsha, jyl basynan beri Úndistannan osymen 5 adam tyrysqaq juqtyryp kelgen. Byltyr Nıý-Delı qalasyna demalýǵa barǵan 5 adam da osy syrqatpen aýyrǵan.
Mamandar jumys babymen nemese qysqy demalysyn Úndistanǵa josparlaǵan adamdarǵa saq bolýdy eskertedi.
«Tropıkalyq elge baratyn adamdar eń aldymen jeke bas gıgıenasyn saqtaýy tıis. Sonymen qatar, taza sý, taza taǵam ishý kerek. Jergilikti halyqpen tyǵyz qarym-qatynasta bolmaýǵa keńes beremiz. Profılaktıka retinde antıbıotık qabyldaǵany jón», - dedi Saıat Qaýmetbaev.
Onyń aıtýynsha, almatylyqtarǵa alańdaýǵa esh negiz joq. Naýqas adamdardyń barlyǵy oqshaýlanyp, juqpanyń juǵý yqtımaldyǵy tómendetildi.
