Qazaqstandyq tyńaıtqysh óndirýshiler Ýkraınaǵa eksportyn burynǵysha jalǵastyra beredi

NUR-SULTAN. QazAqparat - Ýkraına tyńaıtqysh ımportyna qatysty tergep-tekserýdi aıaqtady. Ýkraına - qazaqstandyq «Qazfosfat» JShS jáne «QazAzot» AQ óndiretin tyńaıtqyshty ótkizetin negizgi naryqtyń biri, dep habarlaıdy QazAqparat.

QR Saýda jáne ıntegratsııa mınıstrliginiń habarlaýynsha, Qazaqstannyń Ýkraınaǵa ortasha jyldyq eksporty - shamamen 41 mln AQSh dollary. Ótkiziletin ónim kólemi - 110 myń tonna. Mundaı naryqtyń jabylýy otandyq kásiporyndarǵa keri áser eter edi.

«Tergep-tekserýdiń búkil kezeńinde Saýda jáne ıntegratsııa mınıstrligi qazaqstandyq zaýyttardyń múddesin qorǵap, Ýkraınanyń ýákiletti organymen tyǵyz yntymaqtastyq ornatty. Qazaqstandyq saýda mınıstrliginiń bastamasymen qazaqstandyq tyńaıtqysh úshin kvota berý nemese qazaqstandyq taýardy shara qoldanysynan shyǵarý máselesi qarastyryldy. Sondaı-aq, qazaqstandyq tarap Ýkraınanyń ýákiletti organynyń sheshimin sot tártibimen daýlaý múmkindigin joqqa shyǵarmady» dep málimdedi mınıstrlik.

Sonyń arqasynda qorǵaý sharalary qabyldanǵan joq.

Júrgizilgen jumystyń nátıjesinde qazaqstandyq kompanııalar dástúrli ótkizý naryǵyna eksportty jalǵastyra alady.