Qazaqstandyq týrızmniń ustanymy boıynsha biryńǵaı marketıngtik strategııa joq - S. Áıimbetov
ASTANA. QazAqparat - Qazaqstannyń ımıdjdik sıpattamasyn engizý máselesi ótkir kúıinde qalyp otyr. Qazaqstandyq týrızmniń ustanymy boıynsha biryńǵaı marketıngtik strategııa joq.
Búgin Májiliste elimizdegi týrızm salasyn damytý perspektıvalary jaıynda ótip jatqan Úkimet saǵatynda Ekonomıkalyq reforma jáne óńirlik damý komıtetiniń tóraǵasy, depýtat Seıitsultan Áıimbetov osylaı málim etti.
«Ókinishke oraı, biz kýrorttyq aımaqqa baı emespiz. Bizde turaqty qolaıly klımat kezeńderi joq, sondyqtan ulttyq biregeı ortaǵa baǵyttalyp, bizdiń Otanymyzdyń dástúri men tarıhyna súıenýimiz qajet», - dedi qosymsha baıandama jasaǵan depýtat Seıitsultan Áıimbetov.
Bul rette depýtat týrıstik lagerler oryndarynda «aıtystar», «at jarystary», «kókpar», búrkitpen ań aýlaýdy uıymdastyrý, «saýmaly qymyz» sııaqty dástúrli emdeý ádisteri arqyly densaýlyqty saýyqtyrýǵa demalys oryndaryna belsendi túrde tartý, teatrlandyrylǵan tarıhı qoıylymdar jáne t.b. uıymdastyryp, ulttyq salt-dástúrlerge tartý arqyly kelýshilerdiń qataryn ulǵaıta túsý qajet.
«Halyqaralyq tájirıbeniń ózi osy taqyrypta kóptegen mysalǵa toly. Aıtalyq, Kanadanyń Kvebek qalasyndaǵy «Qysqy karnaval» nemese Latyn Amerıkasynyń «Orýrodaǵy karnaval» 500 myńdaı adamnyń qatysýymen ótedi. Al «Brazılııa karnavaly» jyl saıyn 800 myńnan astam týrısti tartady. Sonymen birge, biz týrıstik aınalymǵa qazirgi zamanǵy ǵylym men tehnıkanyń jetistikterin tarta otyryp, shaǵyn jáne orta bıznestiń damýyna serpin berip, óz qoǵamymyzdyń zamanaýı tehnologııalarǵa ıe ekenimizdi kórsete alamyz. Mysalǵa aıtalyq: Baıqońyrdaǵy «Ǵarysh aılaǵy» qurylysy she? «NASA»-nyń «Mys Kanaveral» ǵarysh ortalyǵyn aralap kórýge jyl saıyn 1 mln. adam keledi eken», - deıdi depýtat S. Áıimbetov.
