Qazaqstandyq týrısterge Ebola bezgeginen saqtaný kerek
ASTANA. QazAqparat - Innovatsııalar jáne damý boıynsha mınıstrliginiń Týrızm ındýstrııasy komıteti týrıster úshin Ebola vırýsy jaıly jadnamany taratty, dep habarlady vedomstvonyń baspasóz qyzmeti.
Ebola gemorragııalyq bezgegi - adam ómirine qaýip tóndiretin aýrý. Ol tekeleı qan arqyly nemese ınfektsııany juqtyrǵan adamnan bólingen zattar, sonymen birge, ony juqtyrǵan adamnyń zattaryn ustaǵannan taralýy múmkin.
Ebola vırýsy kóbine aýrý adamdardy qaraý kezinde tyǵyz baılanysta bolatyn týǵan-týystary men balalary arqyly juǵýy múmkin. Afrıka qurlyǵyna barar aldynda abaı bolý kerek - jergilikti turǵyndarmen tyǵyz baılanys jasaýdyń qajeti joq, sonymen birge, maımyldar jáne jarǵanattardan saq bolǵan jón. Sonymen birge, qorǵaıtyn maskalardy taǵyp, adamdar kóp jınalatyn jerge barýdan bas tartyp, joǵary temperatýraly adamdarmen baılanysýdyń qajeti joq.
Belgileri
Aýrý aǵzaǵa vırýs túskennen keıin kez kelgen kúni qozýy múmkin. Kóbine onyń belgileri 8-10 kún ótkesin bilinedi.
Aýrýdyń bastapqy kezinde bas aýyryp, qan qusady. Bulshyqetter qatty aýyryp, kózden, muryn, qyzyl ıek pen qulaqtan qan ketedi. Deneniń temperatýrasy 39-40 gradýsqa deıin kóteriledi. Al sońǵy belgileri qurǵaq jótel men keýde tusy batyp aýyrady.
Aldyn alý
Aýrýdyń aldyn alý úshin bólmeniń júıeli túrde aýasyn tazartyp, dymqyldandyryp otyrǵan jón, jeke bas tazalyǵyn saqtaý kerek. Zańdastyrylmaǵan saýda oryndarynan azyq-túlik almaǵan durys.
Aýrýdyń belgileri baıqalsa, medıtsınalyq maska taǵyp nemese 4-5 oralǵan dáke orap alǵan durys. Sonymen birge, birden medıtsınalyq kómekke júginý kerek.
Ebola bezgegi oqıǵalary tirkelgen elderden oralǵan adamdarǵa joǵaryda atalǵan belgilerdiń biri baıqalsa, medıtsınalyq kómek alý kerek. Mindetti túrde sońǵy 21 táýlik boıy Gvmneıa nemese soǵan kórshiles elderde bolyp, osy elderge kelgen adamdarmen baılanys jasaǵanyńyzdy habarlaýyńyz kerek.
Anyqtama: Dúnıejúzilik densaýlyq saqtaý uıymynyń aqparaty boıynsha Ebola bezgeginen qaza bolǵan adamdar sany 1013-ke jetti, sońǵy úsh kúnde Batys Afrıka elderinde 52 adam mert boldy.
Búkilálemdik densaýlyq saqtaý uıymy Ebola vırýsyn halyqaralyq mańyzy bar dert ekendigin moıyndap otyr.
