Qazaqstandyq týrısterdiń qorǵalýyna kepildik beretin zań talqyǵa salynbaq
ASTANA. QazAqparat - Qazaqstandyq týrısterdiń qorǵalýyna kepildik beretin zań keler jyly qoǵam talqylýyna usynylmaq.
Bul týraly búgin QR IJTM Týrızm ındýstrııasy komıtetiniń tóraǵasy Marat Iǵalıev málim etti.
«Týrıster múddesi qorǵalýy úshin zańnamaǵa ózgerister engizý maqsatynda jumys tobyn qurdyq. Biz kelesi jyly týrısterimizdiń qorǵalýyna kepildik beretin zańdy talqylaýǵa shyǵarmaqpyz», - dedi ol.
Komıtet basshysynyń atap ótýinshe, komıtet atalǵan zańda baqylaý normalaryn qatańdatýǵa basa mán bermek. Óıtkeni, qazirgi ýaqytta týrızm salasynda lıtsenzııa alý óte jeńil bolyp otyr.
Sonymen qatar komıtet tóraǵasy «Almaz tourizm» týrıstik operatory onyń túrkııalyq seriktesi «Trek Travel International» kompanııasy arasyndaǵy daý sharýashylyq sýbektileriniń býhgalterlik deńgeıinde júrgizilip jatqandyǵyn atap ótti.
M.Iǵalıev óz sózinde «Gúlnár týrmen» baılanysty oryn alǵan jaıtta memleket 1 tıyn da shyǵyndamaǵandyǵyn basa aıtty. «Meniń bilýimshe, «Gúlnár týrdyń» Túrkııadaǵy barlyq týrısterin shilde aıynyń ortasynda elge jetkizdik. Qazirgi ýaqytta Túrkııaǵa demalýǵa barýǵa tıisti týrıster josparly tártippen attanýda», - dedi ol.
