Qazaqstandyq týrıster Taılandta saqtyq tanytqandary jón
ASTANA. 10 qańtar. QazAqparat - QR Indýstrııa jáne jańa tehnologııalar mınıstrligi Týrızm ındýstrııasy komıteti qazaqstandyq týrısterdi Taılanda saqtyq tanytýǵa úndeýde.
Buryn BAQ betterinde habarlanǵanyndaı, Taıland eliniń astanasy - Bangkok qalasynda úkimetke qarsy jappaı aktsııalar ótedi dep josparlanýda. Sonymen qatar atalmysh elde 13 qańtardan aqpannyń ortasyna deıin tótenshe jaǵdaı engizilýi múmkin degen boljam da bar.
«Osy oraıda Týrızm ındýstrııasy komıteti Bangkok áýejaılaryna kelip jatqan qazaqstandyq saıahattaýshylarǵa demalys oryndaryna astanaǵa soqpaı tezirek ornyǵyp alýlaryn suraıdy. Taılandtan ketýdi josparlap qoıǵan týrıster áýejaıǵa barar jolyn aldyn ala qamdap qoıýlary tıis. Qazirgi ýaqytta Taıland kýrorttaryndaǵy jaǵdaı tynysh. Degenmen Bangkokte júrgen qazaqstandyqtardyń saqtyq tanytýlaryn, adam kóp jınalǵan jerlerden aýlaq bolyp, quqyqqorǵaýshylardyń talaptaryn oryndaýlaryn suraımyz», - dep habarlaıdy Týrızm ındýstrııasy komıteti.
