Qazaqstandyq týrıster taǵy da túrik áýe kompanııasynyń kesirinen zardap shekti
ASTANA. QazAqparat - Qazaqstandyq týrıster taǵy da túrik áýe kompanııasynyń kesirinen zardap shekti. Bul jaıynda QR Syrtqy ister mınıstrligi baspasóz qyzmetiniń jetekshisi Ánýar Jaınaqov Feısbýktegi paraqshasynda jazdy, dep habarlaıdy QazAqparat.
«Búgin túnde Túrkııanyń Antalıa qalasynda qazaqstandyq týrıster taǵy da tótenshe jaǵdaıǵa tap bolyp, Qazaqstan konsýlynyń aralasýymen olarǵa kómek kórsetildi. Azamattarymyz kezekti ret túrik áýe kompanııalary biriniń ókilderiniń aram áreketinen japa shekti. 26 shilde kúni saǵat 12-00-de ár elden shamamen 100 jolaýshy, onyń ishinde 30 qazaqstandyq týrıst Antalıadan Ystanbulǵa ushýy tıis bolatyn. Munan ary qazaqstandyqtar Almatyǵa ushýdy josparlaǵan. Belgisiz sebeptermen «Onur Air» áýe kompanııasynyń reısi bastapqyda eki saǵatqa, odan keıin de árbir eki saǵatqa keıinge shegerilip, tún ortasyna qaraı tipti olardyń ushpaıtyndyǵy belgili boldy. Jolaýshylarǵa sebebin túsindirmesten júkterin qaıtaryp berip, Ystanbulǵa reıstiń oryndalmaıtyndyǵyn habarlaǵan», - dep jazdy Jaınaqov.
Onyń jazýynsha, túrik áýe kompanııasy ókilderinen qandaı da bir túsinik ala almaǵan 20 qazaqstandyq óz qarajattarymen Ystanbulǵa ushyp ketken. Al aralarynda kishkentaı balalary bar 10 týrıstiń tamaq alýǵa jáne qonar jerge qarajattary jetkiliksiz bolǵandyqtan Qazaqstannyń Antalıadaǵy konsýldyǵynan kómek suraǵan.
Tún ortasyna taman qazaqstandyq dıplomat otandastarymyzben kezdesip, túriktiń týrıstik kompanııalarynyń biriniń kómegimen shuǵyl arada ystyq tamaq uıymdastyryp, qonaq úıge ornalastyrǵan.
«Áýe kompanııasynyń basshylyǵymen baılanysyp, áýe reısiniń oryndalmaý sebebin anyqtaý jáne azamattarymyzdyń Ystanbulǵa ushýyn talap etý talpynystary esh nátıje bermedi. Áýe kompanııasynyń ókilderi de reıstiń oryndalmaýyna ózderiniń kinálary bar ekendigin rastaıtyn qandaı da bir anyqtama bermeı otyr. Qazirgi ýaqytta qazaqstandyq azamattarǵa kómek kórsetý maqsatynda Qazaqstan konsýly olardy Otanyna jóneltýdi uıymdastyrý máselesimen aınalysýda. Konsýldyń aıtýynsha, olardyń kópshiligi elge oralǵannan keıin túrik áýe kompanııasyn sotqa bermek. Qazaqstandyq dıplomattar kómekke muqtaj bolǵan otandastaryna jedel járdem berý mindetterin oryndady dep esepteımin. Degenmen týrısterdiń ózderine jáne óz demalystaryna jaýapkershilik máselesi ashyq qalyp otyr»,- dedi ol.
Sonymen qatar ol shetelge saparlaıtyn qazaqstandyqtarǵa saparǵa tyńǵylyqty daıyndalýǵa, mundaı jaıtqa dýshar bolmaý úshin artyq aqsha alyp júrýge keńes berdi.
