Qazaqstandyq týrıster men bıznesmenderdiń Polshaǵa vızasyz kelýin qoldaımyn - Andjeı Dýda
ASTANA. QazAqparat - Qazaqstandyq týrıster men bıznesmenderdiń Polshaǵa vızasyz kelýin qoldaımyn. Bul týraly búgin Aqordada Elbasy Nursultan Nazarbaevpen keńeıtilgen quramdaǵy kelissózderden keıin birlesken málimdeme jasaǵan Polsha prezıdenti Andjeı Dýdamen aıtty, dep habarlaıdy QazAqparat.
«Bizdiń kásipkerlerdiń Qazaqstanǵa qyzyǵýshylyǵy óte joǵary. Búgin Astanaǵa tek qana polıak úkimetiniń ókilderi ǵana emes, sonymen birge qazaqstandyq seriktestermen yntymaqtastyqty bastaýǵa nemese tereńdetýge múddelik tanytatyn polıak kompanııalarynyń ókilderi keldi. Polıak fırmalary qazaqstandyq naryqta birneshe jyl boıy jumys isteýde. Menińshe oǵan polıak azamattary úshin 30 kúnge deıin vıza rejımin alyp tastaý syndy áreket óz septigin tıgizip otyr. Іskerlik baılanystardy ǵana emes sondaı-aq týrıstik saparlardy da jeńildetedi. Qazaqstannan bıznesmender men týrısterdiń Polshaǵa vızasyz kelýin qoldaımyn. Biz bul jaında halyqaralyq forýmda da aıttyq. Demek, Prezıdent myrza polıak memleketiniń ókilderi tarapynan qoldaýǵa senim arta berýińizge bolady», - dedi Dýda.
Sonymen qatar Polsha Prezıdenti erteń Qazaqstan Premer-Mınıstri Baqytjan Saǵyntaev «EKSPO-2017» kórmesindegi qazaqstandyq pavılondy kórsetetindigin aıtty.
Aıta keterligi, birlesken málimdeme barysynda Elbasy Nursultan Nazarbaev Andjeı Dýdadan Qazaqstan azamattary úshin Polshada vızasyz rejım engizýdi ótingen bolatyn.
