Qazaqstandyq týrıster 2 kommertsııalyq qurylymnyń bopsalaý nysanyna aınalmaýy tıis - M.Iǵalıev
ASTANA. QazAqparat - Qazaqstandyq týrıster 2 kommertsııalyq qurylymnyń bopsalaý nysanyna aınalmaýy tıis. Bul týraly búgin QR IJTM Týrızm ındýstrııasy komıtetiniń tóraǵasy Marat Iǵalıev málim etti.
Onyń atap ótýinshe, komıtetke «Almaz tourizm» týrıstik operatory shaǵymdanyp, óziniń túrkııalyq seriktesi «Trek Travel International» kompanııasymen arada daý týyndap otyrǵandyǵyn málimdegen. Osy daý saldarynan «Almaz tourizm» týrıstik operatorynyń klıentterin Antalııadaǵy qonaq úıden shyǵara bastaǵan.
«Shuǵyl jumystardyń nátıjesinde jumys shtaby quryldy. Biz jedel jelini iske qostyq. Qazirgi ýaqytta týrıster habarlasýda. Bizdiń aqparattarymyzǵa sáıkes Antalııada 18 týrıst bar. Biz Qazaqstannyń Antalııadaǵy konsýldyǵymen turaqty baılanysyp otyrmyz. Qazirgi ýaqytta ol jaqtaǵy týrısterdiń barlyǵy qonaq úılerde turyp jatyr», - dedi ol.
Sonymen qatar M.Iǵalıevtiń aıtýynsha, Týrızm ındýstrııasy komıteti Túrkııa Respýblıkasynyń Mádenıet jáne týrızm mınıstrliginen Túrkııanyń jekelegen mekemelerimen oryn alǵan ahýalǵa baılanysty qazaqstandyq týrıster úshin zańdy sheshimniń oryn alýyna qolushyn berýdi surap hat joldaǵan.
«Biz qazaqstandyq týrısterdiń eki kommertsııalyq qurylymnyń bopsalaý nysanyna aınalýyna jol berilmeýi kerektigin basa aıttyq. Sondaı-aq dál osyndaı hat «Trek Travel International» kompanııasyna da jiberildi», - dedi komıtet tóraǵasy.
