Qazaqstandyq «Tún qudaıy» fılmi Parıjde kórsetildi
ASTANA. QazAqparat - Parıjde ótken frantsýzdyń «L'Etrange Festival» kınofestıvali aıasynda rejısser Ádilhan Erjanovtyń fılmografııasy kórsetildi, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
Týyndylar arasynda QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasynda túsirilgen «Rıeltor», «Úkili kámshat» jáne «Tún qudaıy» fılmderi de bar.
Rejısser Ádilhan Erjanovtyń aıtýynsha, onyń fılmderine frantsýz kórermeni asa qyzyǵýshylyq tanytqan. Kelýshiler sany kóp bolyp, kezekke turyp kútkender de bolǵan. Sonymen qatar, rejısser túrli kásibı kezdesýler men suhbattar ótkizgen.
«Frantsýzdar óner men kınony brazılııalyqtar fýtboldy túsingendeı uǵynady. Olar úshin óner - ulttyq dástúr. Sondyqtan da kınodaǵy avangard sol jaqtan taraıdy. Kınodaǵy modany Kann men Frantsııa jasaıdy. Ol jaqtyń kórermenimen sóılesýdiń ózi ǵanıbet. Olar sınefılder - qazaq kınosynda bolyp jatqan dúnıelerden habardar. Olarǵa shynymen de meniń kınom qyzyqty», - dedi Erjanov.
«L'Etrange Festival» shırek ǵasyrǵa jýyq ýaqyt ótkizilip keledi. Bul festıval «erekshe, qaıtalanbaıtyn, sırek, joǵary deńgeıdegi» fılmderge arnalǵan. Festıval baǵdarlamasynda negizgi baıqaý (Lars fon Trıerdiń «Djek turǵyzǵan úı» fılmi kórsetiletin) men qysqametrajdy fılmderdiń baıqaýynan bólek, konkýrstan tys baǵdarlamada japon jańa tolqynynyń fılmderiniń kórsetilimi, ańyzǵa aınalǵan Nikkatsu atty japon stýdııasynyń fılmderiniń retrospektıvasy, sondaı-aq «Jańa talanttar», «Derekti kıno» sektsııalary bar.
