Qazaqstandyq tennısshilerdiń tabysy kezdeısoqtyq emes – Qazaqstan tennıs federatsııasynyń prezıdenti

Qazaqstan tennıs federatsııasynyń prezıdenti Bolat Ótemuratov QazAqparat tilshisiniń saýaldaryna jaýap berdi.

- Bolat Jamıtuly, qazaqstandyq jasóspirimder Zańǵar Nurlanuly, Danıel Tazabekov jáne Damır Jalǵasbaı álem chempıonatynda aıdy aspanǵa shyǵaryp, qola júldege qol sozym jerden toqtady. Budan buryn mundaı tabysqa jetý múmkin emesteı kórinetin?

- Men bizdiń jasóspirimderdiń ózderin naǵyz kúresker, birtutas komanda retinde kórsete bilgenine qýanyshtymyn. Ár oıynshy tarıhı tabysqa óz úlesin qosty. Qarsylastardyń óte myqty bolǵanyna qaramastan, olar Qazaqstan tennısiniń kúshin búkil álemge tanyta bildi. Mundaı nátıjege oıynshylardyń qajyrly eńbegi, sondaı-aq ata-analary men bapkerleriniń turaqty qoldaýy arqasynda qol jetti. Bul qazirdiń ózinde jasóspirimderimizdiń álemdik tennıs elıtasynda joǵary orynǵa ıe bola bastaǵanyn kórsetedi.

- Elena Rybakınanyń Ýımbldondaǵy tabysy shet elden oıynshy shaqyrý jónindegi áńgimeni kóbeıtip jiberdi. Kezinde bul tásildiń nelikten qolǵa alynǵanyna núkte qoıa alasyz ba?

- Alǵashqy bolyp ıÝrıı Şýkın, ıAroslava Shvedova, Andreı Golýbev, Mıhaıl Kýkýshkın Qazaqstanǵa keldi. Bularsyz bizdiń ulttyq quramalar Devıs kýbogy men Federatsııa kýbogynyń tómengi dıvızıondarynan qysqa merzimde joǵary kóterilip, álemdik tennıs elıtasyna qosylmas edi. Olar Tımýr Habıbýllın, Kámıla Kerimbaeva, Jibek Qulambaeva syndy qazaqstandyq tennısshilerge úlgi kórsetti.

ıÝrıı Şýkın ulttyq qurama oıynshysy retinde mansabyn aıaqtaǵannan keıin kapıtandyq tizgindi qolǵa aldy. Juptyq synda Ýımbldon jáne US Open syndy «Úlken dýlyǵa» týrnırleriniń chempıony atanyp, úsh olımpıada oıyndarynda óner kórsetken ıAroslava Shvedova da kapıtan boldy. Ekeýi turaqty ótetin semınarlarda bapkerlerimizge óz tájirıbesi men bilgenin úıretip keledi. Olar óz taǵdyryn Qazaqstanmen baılanystyrdy. Andreı Golýbev qyzyljarlyq Merýertke úılense, ıAroslava elordalyq jigitke turmysqa shyqty. Golýbev te, Kýkýshkın de ulttyq qurama músheleri retinde qatardan áli shyqqan joq.

Olardan keıin shaqyrylǵan ıÝlııa Pýtıntseva, Aleksandr Nedovesov, Anna Danılına, Aleksandr Býblık jáne Elena Rybakına – barlyǵy da elimizde tennıstiń qaýyrt damýyna yqpal etti. Sonyń nátıjesinde erler ulttyq quramasy Devıs kýbogynyń shırek fınalyna alty ret shyqty. Endi format ózgergennen keıin úshinshi álem chempıonatynda, al áıelder quramasy alǵash ret dúnıejúzilik dodada óner kórsetetin bolady.

Elena Rybakınanyń Ýımbldondaǵy jeńisinen keıin tennıske qyzyǵýshylyq buryn bolmaǵan deńgeıge jetip, balalaryn tennıs ortalyǵyna bergisi keletin ata-analar sany kúrt artty. Sońǵy jyldary elimizdiń 17 óńirinde 38 tennıs ortalyǵy men 364 kort saldyq. Olar buryn da tańnan keshke deıin jattyǵýdan bosamasa, qazir kort tipti jetpeı jatyr. Sondyqtan bul qurylysty jalǵastyramyz.

- Shaqyrylǵan oıynshylarǵa qansha qarjy jumsalady?

- Qazirgi tańda federatsııa bıýdjeti tolyqtaı demeýshiler qarjysy esebinen quralady. Buryn jalpy bıýdjettiń 25 paıyzǵa deıinin memleket qarjylandyratyn. Sońǵy jyldary bul kórsetkish 2-3 paıyzǵa deıin qysqardy. Qazir sportqa eleýli túrde qarjy bóletindeı memleket múmkindigi joq. Sondyqtan jyl basynda memlekettik qarjylandyrýdan tolyqtaı bas tartý jóninde sheshim qabyldadym.

Bizdiń úzdik oıynshylarymyzdy qarjylandyrý máselesine kelsek, olarda qymbat kelisimshart joq. Negizinen týrnırlerde tapqan tabystarymen ómir súredi. Árıne, federatsııa jetekshi tennısshilerimizge bárinen buryn keńes berý, vızamen qamtý, uıymdastyrý máselelerinde qoldaý kórsetedi.

Federatsııa tarapynan jasóspirimderge jumsalatyn qarjy eresek oıynshylardikinen bes ese artyq. Óńirlerde ákimdikter járdem beredi. Tennıs nysandaryn ustap, qazaqstandyq bapkerlerge ishinara jalaqysyn tóleıdi, úzdik jasóspirimderdiń jarysqa barýyn uıymdastyrady.

- Onda kelesi saýal jasóspirimder týraly. Ulttyq qurama qataryn tolyqtyratyn ul-qyzdarymyzdy tárbıelemeıinshe, úlken tabysqa qol jetkizý múmkin emes qoı?

- Iá. Sol maqsatta federatsııa balalardyń 5-7 jastan jappaı jattyǵýynan bastap barlyq deńgeıde jumys júrgizedi. Balalar kishkentaıynan úlken sportqa beıimdelip, alǵashqy jarystaryna qatyssa, ol óz jemisin bermeı qoımaıdy. Mysaly, «10 jasqa deıin tennıs» jobasyna úlken mán beremiz. Federatsııa mamandary 10 jasqa deıingiler arasyndaǵy negizgi týrnırlerge baryp, oıynshylardy baqylaıdy, olardyń bapkerlerimen aqyldasyp, keńesin beredi.

- Team Kazakhstan akademııasy týraly aıta ketseńiz, ol Qazaqstan kásibı tennısine ne beredi? Qazirdiń ózinde nátıje kórsetip júrgen jas tennısshilerden kimderdi atar edińiz?

- Team Kazakhstan akademııasy 2008 jyly quryldy. Osy kezge deıin odan 180-nen astam talantty jastar tárbıelenip shyqty. Olardyń qatarynda Denıs Evseev, Dmıtrıı Popko, Kámıla Kerimbaeva, Ekaterına Dmıtrıchenko, Gózal Aınıtdınova, Jibek Qulambaeva jáne basqalardy ataýǵa bolady.

Keıingi jastar jóninde sóz qozǵasaq, álemniń jasóspirimder arasynda 74-raketkasy, bıyl «Úlken dýlyǵa» týrnırine eki ret qatysqan Maksım Batıýtenko, sondaı-aq Islam Orynbasar, Erasyl Erdilda, Arslanbek Aıtqulov, Vıtalıı Zatsepın, Danır Qaldybekovterden úlken úmit kútemiz. Qyzdar arasynda álemniń jasóspirimder arasynda 66-raketkasy, bıylǵy «Úlken dýlyǵa» týrnırlerinde úsh márte baq synaǵan Arýjan Saǵyndyqova, 2022 jylǵy Ýımbldon jasóspirimder jarysynda óner kórsetken Sandýǵash Kenjebaeva (90-raketka), Janel Rústemovalar (145-raketka) bar.

- Ótken jyly qazaqstandyq jasóspirimder jekeleı jáne juptyq synda 37 ITF Juniors dodasynda chempıon atandy. Taǵy 44 týrnırde fınalǵa deıin jetti. 14 jasqa deıingiler arasynda Tennis Europe jarystarynda 19 tıtýldy jeńip aldy. 15 ret fınalǵa shyqty.

- Bul jerde sol jasóspirimderdiń jeke bapkerleri men federatsııa kýratorlarynyń eńbegin erekshe atar edim. Sońǵy eki jylda jekeleı synda bes ret Tennis Europe týrnırin utqan 13 jastaǵy Zańǵar Nurlanulynyń aıaq alysy bólek. Qazir ol 14 jasqa deıingiler arasynda Tennis Europe reıtıngisinde altynshy orynda tur. Damır Jalǵasbaı men Danıel Tazabekov te úzdik júzdikte. Sondaı-aq jyl saıyn sheberligi ósip kele jatqan, qazirdiń ózinde 18 jasqa deıingiler arasynda ITF dodalarynda tabysty óner kórsetip júrgen Іńkár Dúısebaı, Zara Dárken, Ámir Omarhanov, Erasyl Baqtııar, Polına Sleptsova, Erasyl Erdilda sııaqty oıynshylarymyz az emes.

Bıyl Qazaqstan tennıs federatsııasy 30 jyldyǵyn atap ótedi. Bizdiń aldymyzda elimizde tennıs sportyn odan ári damytyp, bolashaq chempıondardy tárbıeleý, búgingi tabystardy baıandy etý baǵytynda úlken mindetter tur.

- Áńgimeńizge rahmet!