Qazaqstandyq tennısshilerdiń Astana Open týrnırindegi qarsylastary belgili boldy
NUR-SULTAN. QazAqparat – Nur-Sultan qalasynda Astana Open ATP 250 týrnıriniń jerebesi tartyldy, dep habarlaıdy QazAqparat tilshisi.
Qazaqstan astanasynda alǵash ret ótkeli otyrǵan álemdik jarysqa elimizdiń barlyq betke ustar tennısshileri qatysady.
Qazaqstannyń birinshi, álemniń 49-raketkasy Aleksandr Býblık bastapqy kezdesýin dúnıejúzilik reıtıngte 223-orynda turǵan amerıkalyq Makkenzı Makdonaldpen ótkizedi. A.Býblık osynyń aldynda Sankt-Peterbýrgte tartysty matchta qarsylasyn tize búktirgen bolatyn.
Taǵy bir qazaqstandyq, reıtıngte 89-satydaǵy Mıhaıl Kýkýshkın álemniń 76-raketkasy, argentınalyq Federıko Delbonıspen sheberlik baıqasady.
Qazaqstan tennıs federatsııasy málim etkenindeı, Dmıtrıı Popko men Tımofeı Skatov jáne álemniń burynǵy 18-raketkasy, ıtalııalyq Andreas Seppı negizgi dodaǵa arnaıy shaqyrtý aldy. Bul – álemniń 173-raketkasy D.Popko men reıtıngte 450-orynda turǵan 19 jastaǵy T.Skatov úshin úlken múmkindik.
D.Popko birinshi aınalymda álemniń 83-raketkasy, moldovalyq Radý Albotpen kezdesedi. Al T.Skatovtyń qarsylasy irikteý saıysy jeńimpazdarynyń biri bolmaq.
Sonymen qatar Qazaqstan quramasynyń múshesi, reıtıngte 372-oryndaǵy Denıs Evseev irikteý saıystaryna joldama aldy. Ol 25 qazanda bastalatyn irikteý dodasynyń jartylaı fınalynda álemniń 117-raketkasy, aýstralııalyq Mark Polmanspen kúsh synasady. Іrikteý synyna qatysatyn taǵy bir qazaqstandyq, 332-satydaǵy Aleksandr Nedovesov álemniń 114-raketkasy, bosnııalyq Damır Djýmhýrmen kortqa shyǵady.
Astana Open dodasy 1 qarashada márege jetedi.
Eske sala keteıik, budan buryn Elena Rybakınanyń Aýstrııadaǵy Lınts týrnırine qatysatynyn jazǵan bolatynbyz.
