Qazaqstandyq tennısshilerdiń AQSh ashyq chempıonatyndaǵy qarsylastary belgili boldy

Júlde qory 53,4 mln AQSh dollaryna baǵalanǵan, 31 tamyz – 14 qyrkúıek aralyǵynda ótetin «Úlken dýlyǵa» týrnırinde Qazaqstannan bes sportshy baq synaıdy.

Áıelder arasynda jekeleı synda Qazaqstannyń basty úmiti –álemniń 17-raketkasy Elena Rybakına. Ótken jyly alǵashqy aınalymnan asa almaǵan E.Rybakına bıyl tórt birdeı WTA týrnıriniń fınalynda oınap, sonyń bireýinde jeńiske jetken edi. Sonyń nátıjesinde 17-satyǵa kóterilgen qazaqstandyq tennısshi bıylǵy US Open dodasynyń 11-raketkasy bolyp tirkelip otyr. Onyń bastapqy qarsylasy – álemniń 107-raketkasy, ýkraınalyq Katarına Zavatskaıa. Elenanyń bul joly tabysty óner kórsetetindeı tolyq múmkindigi bar.

Álemniń 33-raketkasy ıÝlııa Pýtıntsevaǵa jerebe joldas bolyp, ol reıtıngte 597-orynda turǵan amerıkalyq Robın Montgomerımen kezdesedi.

Al reıtıngte 66-orynda turǵan taǵy bir qazaqstandyq Zarına Dııasqa qıyndaý tıedi. Ol álemniń 61-raketkasy, amerıkalyq Bernarda Peramen sheberlik baıqasady.

Erler arasynda Qazaqstannyń birinshi, álemniń 51-raketkasy Aleksandr Býblık bastapqy kezdesýin reıtıngte 44-orynda turǵan ulybrıtanııalyq Kaıl Edmýndpen ótkizedi. Eger ony jeńip ketse, ekinshi aınalymda álemniń 1-raketkasy, serbııalyq Novak Djokovıchpen kortqa shyǵýy múmkin.

Reıtıngte 90-orynda turǵan Mıhaıl Kýkýshkın álemniń 76-raketkasy, majarstandyq Atılla Balashpen kúsh synasady.

Bıyl koronavırýs indetine baılanysty AQSh chempıonatyna barýdan bas tartqan tennısshiler az emes. Mysaly, áıelder arasynda álemniń birinshi jáne ekinshi raketkalary dodaǵa qatyspaıdy. Bul joly álemniń úshinshi raketkasy, chehııalyq Karolına Plıshkova kóshbasshy bolyp tur. Myqty tennısshilerdiń joqtyǵyn sátti paıdalansa, basqa sportshylar qomaqtyraq tabys tabýmen birge óz reıtıngilerin jaqsarta alady.

Eske sala keteıik, budan buryn tennısshi Andreı Golýbevtiń Italııadaǵy jarystyń chempıony atanǵanyn jazǵan bolatynbyz.