Qazaqstandyq tennısshiler Shymkenttegi týrnırdiń fınalyna shyqty
Qazaqstan tennıs federatsııasynan málim etkenindeı, Jibek Qulambaeva juptyq synda Nıderland ókili Djýdıt Vısshermen birge jartylaı fınalda reseılikter Ekaterına Maklakova – Vıktorııa Mıhaılovamen kezdesti.
Qulambaeva – Vısshermen juby 6:0, 6:4 esebimen jeńiske jetti.
Ekinshi jartylaı fınalda Janel Rústemova men Arýjan Saǵyndyqova taǵy bir qazaqstandyq Gózal Aınıtdınova – reseılik Anastasııa Sýhotınamen sheberlik baıqasty. Birinshi set 6:4 esebimen Arýjan men Janeldiń paıdasyna sheshildi. Ekinshi partııa basynda Gózal jaraqat alyp qalyp, matchty jalǵastyra almady.
Osylaısha fınalda J.Qulambaeva – D.Vıssher jáne J.Rústemova – A.Saǵyndyqova juptary bas júldeni sarapqa salady.
Sonymen qatar J.Qulambaeva jekeleı synda jartylaı fınalǵa ótti. Ol fınalǵa shyǵý úshin reseılik A.Sýhotınamen talasady.
Eske sala keteıik, budan buryn Qazaqstan jasóspirimder quramasynyń ÁCh irikteý kezeńinde úshinshi orynǵa talasatynyn, Elena Rybakınanyń Madrıd týrnırin jeńispen bastaǵanyn jazǵan bolatynbyz.
Sondaı-aq qazaqstandyq tennısshi Mıýnhen týrnıriniń fınalyna shyǵa almady.