Qazaqstandyq tennısshiler Shveıtsarııadaǵy jarystyń fınalyna shyǵa almady
ASTANA. QazAqparat – Qazaqstandyq tennısshiler Aleksandr Nedovesov pen Andreı Golýbev Bazel (Shveıtsarııa) ATP 500 týrnıriniń fınalyna shyǵa almady, dep habarlaıdy QazAqparat tilshisi.
Qazaqstandyq jup jartylaı fınalda horvatııalyq Ivan Dodıg – amerıkalyq Ostın Kraıchekpen sheberlik baıqasty.
Birinshi partııa barysynda breık jasaǵan horvatııalyq-amerıkalyq jup tarazy basyn ózderine aýdara bildi – 6:3.
Osy jaǵdaı ekinshi sette de qaıtalandy – 6:4.
Bir saǵattan astam ýaqytqa sozylǵan matchta A.Nedovesov pen A.Golýbev 3 eıspen ǵana kózge tústi. Qarsylastary 5 eıspen birge 4 breık-poınttyń teń jartysyn paıdalandy.
I.Dodıg pen O.Kraıchek fınalda frantsııalyqtar Nıkolıa Maıý – Edýar Roje-Vasslenmen bas júldeni sarapqa salady.
Jalpy, bul doda A.Golýbev pen A.Nedovesov úshin tabysty boldy deýge bolady. Olar óz sporttyq jolynda juptyq synda alǵash ret ATP 500 týrnıriniń jartylaı fınalyna deıin jetti.
Eske sala keteıik, budan buryn qazaqstandyq tennısshilerdiń Shveıtsarııadaǵy týrnırdiń jartylaı fınalyna shyqqanyn jazǵan bolatynbyz.
Sondaı-aq Aleksandr Býblık Shveıtsarııada álemniń toǵyzynshy raketkasyna jol berdi.
