Qazaqstandyq tennısshiler Shveıtsarııadaǵy týrnırdiń jartylaı fınalyna shyqty
ASTANA. QazAqparat – Qazaqstannyń juptyq syndaǵy myqtylary Aleksandr Nedovesov pen Andreı Golýbev Bazel (Shveıtsarııa) ATP 500 týrnıriniń jartylaı fınalyna shyqty, dep habarlaıdy QazAqparat tilshisi.
Qazaqstandyq jup shırek fınalda brazılııalyq Rafael Matos – ıspanııalyq Davıd Vega Ernandespen kúsh synasty.
A.Golýbev pen A.Nedovesov qarsylastarynan 7:5, 6:3 esebimen basym tústi.
Saǵat jarymǵa jýyq ýaqytqa sozylǵan match barysynda qazaqstandyqtar 7 eıs jasap, 12 breık-poınttyń úsheýin paıdalandy.
Andreı Golýbev pen Aleksandr Nedovesov fınalǵa shyǵý úshin horvatııalyq Ivan Dodıg – amerıkalyq Ostın Kraıchekpen talasady. Bul jup shırek fınalda jarystyń birinshi raketkalary, salvadorlyq Marselo Arevalo – nıderlandylyq Jan-Jıýlen Roıerdi qapy qaldyrdy – 6:4, 6:3.
Taǵy bir qazaqstandyq, reıtıngte 331-orynda turǵan Beıbit Jýkaev Brest (Frantsııa) chellendjer týrnıriniń shırek fınalyna óte almaı qaldy. Ol ekinshi aınalymda álemniń 110-raketkasy, frantsııalyq Gregýar Barrerden jeńilis tapty – 2:6, 4:6.
Eske sala keteıik, budan buryn qazaqstandyq tennısshilerdiń Shveıtsarııadaǵy jarystyń shırek fınalyna shyqqanyn jazǵan bolatynbyz.
Sondaı-aq qazaqstandyq eki jas tennısshi álemdegi úzdik 100 oıynshynyń qataryna kirdi.
Aleksandr Býblık jekeleı synda Shveıtsarııadaǵy týrnırdiń shırek fınalyna ótti.
Foto: sports.kz
