Qazaqstandyq tennısshiler Rolan Garros týrnırinde qansha tabys tapty
Frantsııa ashyq chempıonatynda barlyǵy jeti qazaqstandyq tennısshi baq synady.
Rolan Garros jarysynyń bıylǵy júlde qory 49,6 mln eýro bolsa, qazaqstandyq oıynshylar barlyǵy 485 myń eýro (234,4 mln teńge) tabys tapty.
ıÝlııa Pýtıntseva — 150 500 eýro (8 500+142 000).
Tabys tabý jóninen ıÝlııa Pýtıntseva alda tur. Ol jekeleı synda úshinshi aınalymǵa deıin jetti. Juptyq synda reseılik Kamılla Rahımovamen birge alǵashqy aınalymnan asa almady.
Elena Rybakına — 142 000 eýro.
Qazaqstannyń birinshi raketkasy Elena Rybakına jekeleı synda úshinshi aınalymǵa deıin jetkenimen, syrqattanyp qalýyna baılanysty jarysty jalǵastyra almady. Juptyq synda ol básekege túsken joq.
Aleksandr Býblık — 77 500 eýro (8 500+69 000).
Qazaqstannyń erler arasynda birinshi raketkasy A.Býblık jekeleı jáne juptyq synda da alǵashqy aınalymnan asa almady.
Tımofeı Skatov — 69 000 eýro.
Rolan Garros týrnırine alǵash ret qatysqan T.Skatov birinshi kezdesýinde súrindi.
Aleksandr Nedovesov — 21 500 eýro.
A.Nedovesov meksıkalyq Mıgel Anhel Reıes-Varelamen birge juptyq synda úshinshi aınalymǵa deıin jetti.
Anna Danılına — 16 000 eývro (2 500+13 500).
A.Danılına mıkst pen juptyq synda óner kórsetti. Ol meksıkalyq Santıago Gonsalespen birge mıkste bastapqy kezdesýinde jeńilip qaldy. Al majarstandyq Tımeıa Baboshpen birge ekinshi aınalymda qarsylastaryna ese jiberdi.
Andreı Golýbev — 8 500 eýro.
A.Golýbev ekvadorlyq Gonsalo Eskobarmen birge juptyq synda alǵashqy oıynynda jarystyń birinshi raketkalary, nıderlandylyq Ýeslı Kolhof – ulybrıtanııalyq N.Skýpskıge tap bolyp, utylyp qaldy. Keıin osy dýet A.Nedovesov pen M.-A.Reıes-Varelaǵa da tosqaýyl qoıdy.
Rolan Garros dodasy odan ári jalǵasýda. Ókinishke qaraı, qazaqstandyqtardan eshkim de ekinshi aptaǵa jete almady. Ásirese, Qazaqstannyń kóshbasshy oıynshysy Elena Rybakınanyń aýyryp qalǵany onyń tabysty óner kórsetýine múmkindik bermedi.
Eske sala keteıik, budan buryn qazaqstandyq tennısshiniń Bosnııadaǵy týrnırdiń fınalyna shyǵa almaǵanyn jazǵan edik.
Sondaı-aq Elena Rybakına Rolan Garroste kıgen kıimimen erekshelendi.
Beıbit Juqaev AQSh-taǵy jarystyń fınalynda jeńilip qaldy.
