Qazaqstandyq tennısshiler Rım týrnırin jeńispen bastady
NUR-SULTAN. QazAqparat – Qazaqstandyq tennısshiler Anna Danılına men Elena Rybakına juptyq synda Rım WTA 1000 týrnırin jeńispen bastady, dep habarlaıdy QazAqparat tilshisi.
Qazaqstannyń juptyq syndaǵy birinshi, álemniń 20-raketkasy Anna Danılına reseılik Ekaterına Aleksandrovamen birge alǵashqy aınalymda ıtalııalyqtar Klaýdııa Djovıne – Anastasııa Grımalskamen kortqa shyqty.
Qazaqstandyq-reseılik jup bir saǵattan astam ýaqytqa sozylǵan matchta 6:3, 6:4 esebimen jeńiske jetti.
A.Danılına men E.Aleksandrova shırek fınalǵa shyǵý úshin jarystyń 2-raketkalary, kanadalyq Gabrıela Dabrovskı – meksıkalyq Djýlıana Olmospen talasady.
E.Rybakına taǵy bir reseılik Lıýdmıla Samsonovamen birge bastapqy kezdesýin belgııalyq Kırsten Flıpkens – ıspanııalyq Sara Sorrıbes-Tormomen ótkizdi.
Bul match áldeqaıda tartysty órbidi.
Birinshi partııada qazaqstandyq-reseılik jup 6:4 esebimen basymdylyq tanytsa, ekinshisinde qarsylastary ese qaıyrdy – 2:6.
Sýper taı-breıkte E.Rybakına men L.Samsonova jeńisti julyp aldy – 11:9.
Tartysty báseke saǵat jarymǵa sozyldy.
E.Rybakına men L.Samsonovanyń ekinshi aınalymdaǵy qarsylastary keıin anyqtalady.
Eske sala keteıik, budan buryn qazaqstandyq jas tennısshiniń Dýshanbedegi týrnırdiń absolıýtti chempıony atanǵanyn, ıÝlııa Pýtıntsevanyń Rımde negizgi týrnırge joldama alǵanyn jazǵan bolatynbyz.
Sondaı-aq Elena Rybakına álemdik reıtıngide 17-orynǵa kóterildi.
