Qazaqstandyq tennısshiler Kanadadaǵy týrnırlerde utylyp qaldy
NUR-SULTAN. QazAqparat – Qazaqstandyq tennısshiler Kanadadaǵy týrnırlerde utylyp qaldy, dep habarlaıdy QazAqparat tilshisi.
Qazaqstandyq, dúnıejúzilik reıtıngte 39-orynda turǵan Aleksandr Býblık Toronto masters týrnıriniń ekinshi aınalymynda álemniń 2-raketkasy, reseılik Danııl Medvedevpen kúsh synasty.
Tartysty ótken matchta qazaqstandyq tennısshi 6:4, 3:6, 3:6 esebimen qarsylasyna jol berdi.
Eki saǵatqa sozylǵan básekede A.Býblık 14 eıs jasap, 4 breık-poınttyń bireýin ǵana paıdalandy. D.Medvedevtiń esebinde – 13 eıs, 2 breık.
Qazaqstandyq tennısshi bastapqy kezdesýinde álemniń 26-raketkasy, ulybrıtanııalyq Danıel Evansty 6:4, 6:4 esebimen tize búktirgen bolatyn.
Júlde qory 2,8 mln AQSh dollarynan asatyn Toronto jarysy 15 tamyzda márege jetedi.
Monreal qalasynda ótip jatqan WTA 1000 týrnırinde de qazaqstandyq tennısshilerdiń qadamy sátti bola qoıǵan joq.
Qazaqstannyń birinshi, álemniń 19-raketkasy Elena Rybakına reıtıngte 52-satydaǵy reseılik Lıýdmıla Samsonovamen sheberlik baıqasty. Osy dodanyń 12-raketkasy bolyp tirkelgen E.Rybakına 4:6, 7:5, 4:6 esebimen jeńilip qaldy. 2 saǵat 8 mınýtqa sozylǵan kezdesýde qazaqstandyq tennısshi 16 eıs jasap, 8 breık-poınttyń ekeýin óz esebine jaza aldy. Qarsylasy 7 eısqa qosa bir breıkti artyq jasady.
Álemniń 36-raketkasy ıÝlııa Pýtıntseva ózinen reıtıngte úsh saty joǵary turǵan taǵy bir reseılik Veronıka Kýdermetovadan 6:1, 2:6, 4:6 esebimen utylyp qaldy. 2 saǵatqa sozylǵan básekede úshinshi sette qazaqstandyq sportshy 3:0 esebimen alǵa shyqqanymen, sol basymdylyqty saqtaı almady.
Júlde qory 1,8 mln AQSh dollarynan asatyn Monreal dodasy da 15 tamyzda aıaqtalady.
