Qazaqstandyq tennısshiler Horvatııadaǵy týrnırdiń fınalynda utylyp qaldy
NUR-SULTAN. QazAqparat – Qazaqstandyqtar Aleksandr Nedovesov pen Andreı Golýbev juptyq synda Zagreb (Horvatııa) chellendjer týrnıriniń fınalynda utylyp qaldy, dep habarlaıdy QazAqparat tilshisi.
Osy dodanyń 1-raketkasy bolyp tirkelgen qazaqstandyqtar fınalda amerıkalyqtar Evan Kıng – Hanter Rıspen bas júldeni sarapqa saldy.
Budan bir jyldan astam ýaqyt buryn, 2020 jyldyń qańtarynda qarsylastar Taıland jarysynyń shırek fınalynda kezdesken bolatyn. Onda A.Nedovesov pen A.Golýbev 7:5, 6:1 esebimen amerıkalyqtardy utqan edi.
Qazaqstandyq jup osyndaı chellendjer týrnırlerinde alty tıtýldy ıelense, sońǵysyn bıylǵy sáýirde Horvatııanyń Splıtinde jeńip alǵan bolatyn.
Bul joly Zagrebte amerıkalyq jup qarymta qaıyryp, 6:2, 7:6 (7:4) esebimen utyp ketti.
Báseke 1 saǵat 25 mınýtqa sozyldy.
Taǵy bir qazaqstandyq, álemniń 103-raketkasy Mıhaıl Kýkýshkın jekeleı synda Jeneva ATP týrnıriniń irikteý saıysynda dúnıejúzilik reıtıngte 166-orynda turǵan chılılik Alehandro Tabılodan 3:6, 1:6 esebimen utylyp qaldy.
Denıs Evseev Bosnııa jáne Gertsogovınada ótip jatqan ITF jarysynyń jartylaı fınalynda bosnııalyq Aldın Shetkıchke 5:7, 2:6 esebimen ese jiberdi.
Áıelder arasynda qazaqstandyq Anna Danılına Parma (Italııa) WTA jarysynyń irikteý saıysynda kanadalyq Rebekka Marınodan (3:6, 1:6) asa almady.
Eske sala keteıik, budan buryn qazaqstandyq tennısshilerdiń Horvatııadaǵy týrnırdiń fınalyna shyqqanyn jazǵan bolatynbyz.
