Qazaqstandyq tennısshiler halyqaralyq týrnırlerdiń shırek fınalyna shyqty
NUR-SULTAN. QazAqparat - Qazaqstandyq Tımofeı Skatov Portýgalııadaǵy Oeırash chellendjer týrnıriniń shırek fınalyna shyqty, dep habarlaıdy Olympic.kz QTF baspasóz qyzmetine silteme jasap.
Dúnıejúzilik reıtıngide 441-orynda turǵan 20 jastaǵy tennısshi ekinshi aınalymda álemniń 316-raketkasy, portýgalııalyq Gonsalý Olıveıramen kezdesti. Tımofeı Skatov 1 saǵat 16 mınýtqa sozylǵan matchta 6:3, 6:1 esebimen jeńiske jetti. Qazaqstandyq tennısshi jartylaı fınalǵa shyǵý úshin álemniń 363-raketkasy, ıspanııalyq Nıkolas Sanche-Iskerdomen talasady.
Taǵy bir qazaqstandyq Aleksandr Nedovesov chehııalyq Roman Jebavymen birge juptyq synda Parma (Italııa) ATP týrnırin jeńispen bastady. Qazaqstandyq-chehııalyq jup ıspanııalyqtar Davıd Morrero - Davıd Vega-Ernandesti 6:7 (3:7), 6:2, 10:6 esebimen tize búktirdi. Endi olar shırek fınalda osy dodanyń 1-raketkalary, belgııalyqtar Sander Jılle - Ioran Flıgenmen sheberlik baıqasady.