Qazaqstandyq tennısshiler halyqaralyq týrnırlerdiń fınalyna shyqty
NUR-SULTAN. QazAqparat – Qazaqstandyq tennısshiler Grıgorıı Lomakın men Arýjan Saǵyndyqova halyqaralyq týrnırlerdiń fınalyna deıin jetti, dep habarlaıdy QazAqparat tilshisi.
Qazaqstan tennıs federatsııasy málim etkenindeı, Grıgorıı Lomakın juptyq synda ýkraınalyq Oleg Prıhodkomen birge Pereıra (Kolýmbııa) ATP Challenger týrnıriniń fınalynda venesýelalyq Lýıs Martınes – kolýmbııalyq Krıstıan Rodrıgespen kúsh synasty.
G.Lomakın men O.Prıhodko tájirıbeli qarsylastarymen teńbe-teń dárejede óner kórsetti.
Eki set te taı-breıkke deıin jetip, onda L.Martınes pen K.Rodrıges sáttirek oınady – 7:6 (7:2), 7:6 (7:3).
Marokkoda sondaı-aq úshinshi sanattaǵy ITF Juniors jarysy márege jetti. Onda taǵy bir qazaqstandyq Arýjan Saǵyndyqova portýgalııalyq Sofıa Pıntomen birge sońǵy básekede jergilikti sportshylar Mafalda Gýedesh – Matılda Moraısqa ese jiberdi – 2:6, 4:6.
Eske sala keteıik, budan buryn Aleksandr Nedovesovtiń Ispanııada «Úlken dýlyǵa» týrnıriniń úsh dúrkin chempıonyn utqanyn, qazaqstandyq tennısshiniń Kolýmbııadaǵy jarystyń fınalyna shyqqanyn jazǵan bolatynbyz.
Sondaı-aq Zańǵar Nurlanuly bolashaqta «Úlken dýlyǵa» týrnırinde jeńiske jetkisi keletinin málim etti.
