Qazaqstandyq tennısshiler Barselona týrnırin jeńispen bastady
NUR-SULTAN. QazAqparat – Qazaqstandyq tennısshiler Dmıtrıı Popko men Tımofeı Skatov Barselona chellendjer týrnırin jeńispen bastady, dep habarlaıdy QazAqparat tilshisi.
Ótken aptada Lıssabon jarysynda jeńimpaz atanyp, sonyń nátıjesinde álemdik reıtıngte 164-orynǵa kóterilgen 24 jastaǵy D.Popko bastapqy kezdesýin álemniń 280-raketkasy, frantsııalyq Trıstan Lamazınmen ótkizdi.
Qazaqstandyq tennısshi 6:3, 6:2 esebimen basym tústi.
D.Popko shırek fınalǵa shyǵý úshin álemniń 159-ynshy, osy dodanyń 6-raketkasy, aýstralııalyq Mark Polmans nemese reıtıngte 352-satydaǵy frantsııalyq Matteo Martınonyń bireýimen talasady.
Taǵy bir qazaqstandyq, álemniń 270-raketkasy, 20 jastaǵy Tımofeı Skatov alǵashqy aınalymda reıtıngte ózinen bes saty tómen turǵan frantsııalyq Manýel Gınarmen kezdesti.
Tartysty ótken matchta qazaqstandyq sportshy 3:6, 7:6 (7:4), 6:1 esebimen jeńiske jetti.
T.Skatov ekinshi aınalymda álemniń 116-ynshy, jarystyń 2-raketkasy, slovakııalyq Aleks Molchanmen kortqa shyǵady.
Eske sala keteıik, budan buryn Elena Rybakınanyń Chıkago jarysynyń fınalyna shyǵa almaǵanyn, Dmıtrıı Popkonyń Lıssabonda chempıon atanǵanyn jazǵan bolatynbyz.
Sondaı-aq Zarına Dııas Indıan-Ýells týrnıriniń irikteý saıysyn sátti bastady.
