Qazaqstandyq tennısshi Ystanbulda negizgi týrnırge joldama aldy
NUR-SULTAN. QazAqparat - Qazaqstandyq tennısshi Elena Rybakına Ystanbulda WTA-nyń negizgi týrnırine joldama aldy, dep habarlaıdy QazAqparat tilshisi.
Dúnıejúzilik reıtıngte 161-orynda turǵan, irikteý týrnırinde 10-raketka bolyp tirkelgen 19 jasar E.Rybakına sátti óner kórsete bildi.
Ol aldymen irikteý saıystarynyń jartylaı fınalynda reıtıngte 242-oryndaǵy burynǵy otandasy, reseılik Valentına Ivahnenkonyń meselin qaıyrdy. Ekinshi partııada (birinshi set - 6:1) esep 1:0 bolǵanda, V.Ivahnenko jarysty jalǵastyrýdan bas tartty.
Búgin irikteý týrnıriniń besinshi, álemniń 142-raketkasy, vengrııalyq, 25 jasarTımeıa Baboshpen kezdesti.
Birinshi partııada esep 5:4 bolǵanda, E.Rybakına breık jasaı aldy - 6:4.
Ekinshi sette esep 3:0 bolǵanda, T.Babosh ta básekeni jalǵastyrýdan bas tartty.
Osylaısha E.Rybakına júlde qory 250 myń AQSh dollaryna baǵalanǵan negizgi týrnırge joldama aldy. Onyń qarsylasy keıin anyqtalady.
Ystanbul týrnıri 28 sáýirde márege jetedi.
Eske sala keteıik, budan buryn Qazaqstan áıelder quramasynyń Londonda ulybrıtanııalyqtardan jeńilip qalǵanyn jazǵan bolatynbyz.
Erler arasynda Dmıtrıı Popko AQSh-taǵy týrnırdiń jeńimpazy atansa, Qazaqstannyń birinshi raketkasy Mıhaıl Kýkýshkın Býdapesht týrnıriniń ekinshi aınalymyna óte almady.
