Qazaqstandyq tennısshi Ystanbul týrnıriniń ekinshi aınalymyna shyqty
NUR-SULTAN. QazAqparat - Qazaqstandyq tennısshi Beıbit Jýkaev Ystanbul chellendjer týrnıriniń ekinshi aınalymyna shyqty, dep habarlaıdy QazAqparat tilshisi.
Álemniń 357-raketkasy, Aqtaý tennıs mektebiniń túlegi negizgi dodaǵa irikteý saıystarynan keıin qosylǵan bolatyn.
Beıbit alǵashqy aınalymda dúnıejúzilik reıtıngte 1538-orynda turǵan túrkııalyq Aksý Chengızben sheberlik baıqasty.
Qazaqstandyq sportshy bir saǵattan astam ýaqytqa sozylǵan matchta 6:3, 6:4 esebimen jeńiske jetti.
Beıbit Jýkaev 5 eıspen birge 6 breık-poınttyń teń jartysyn paıdalana bildi. Qarsylasy 2 eıs, 1 breıkten asa almady.
B.Jýkaev shırek fınalǵa shyǵý úshin álemniń 234-raketkasy, ıspanııalyq Nıkolas Alvares Varonamen talasady.
Eske sala keteıik, budan buryn tennısten Devıs kýbogynda Qazaqstan Nıderlandy komandasymen kezdesetinin jazǵan bolatynbyz.
