Qazaqstandyq tennısshi Taılandtaǵy týrnırdiń chempıony atandy
ASTANA. QazAqparat – Qazaqstandyq Grıgorıı Lomakın Nakhonsıthammaratta (Taıland) ótken ITF týrnıriniń chempıony atandy, dep habarlaıdy QazAqparat tilshisi.
Dúnıejúzilik reıtıngte 1057-orynda turǵan qazaqstandyq tennısshi júlde qory 15 myń AQSh dollaryna baǵalanǵan jarys barysynda bes tennısshini tize búktirdi.
Fınalda 25 jastaǵy G.Lomakın álemniń 680-inshi, dodanyń 3-raketkasy Kasıdıt Samreımen bas júldeni sarapqa saldy.
Birinshi partııada qazaqstandyq sportshy taı-breıkte ábjildik tanytty – 7:6 (7:2). Ekinshisinde 4:6 esebimen ese jibergenimen, sheshýshi sette jeńisti julyp aldy – 6:3.
Eske sala keteıik, budan buryn Tımofeı Skatovtyń AQSh ashyq chempıonatynda negizgi týrnırge joldama alǵanyn jazǵan bolatynbyz.
