Qazaqstandyq tennısshi Taılandtaǵy týrnırdiń chempıony atandy
NUR-SULTAN. QazAqparat – Taılandtaǵy ITF W25 Chiang Rai 2 týrnırinde juptyq synda óner kórsetken qazaqstandyq Gózal Aınıtdınova chempıon atandy, dep habarlaıdy QazAqparat tilshisi.
Jarystyń birinshi raketkasy bolyp tirkelgen G.Aınıtdınova reseılik Marııa Tımofeevamen birge tórt kezdesý ótkizip, bárinde jeńiske jetti.
Qazaqstandyq-reseılik jup fınalda japonııalyq Momoko Koborı – taılandtyq Lýksıka Kýmhýmmen bas júldeni sarapqa saldy.
Birinshi partııada japonııalyq-taılandtyq jup 6:2 esebimen basym tússe, ekinshisinde Aınıtdınova men Tımofeeva ese qaıyrdy – 7:5. Sosyn sýper taı-breıkte jeńisti julyp aldy – 10:4.
G.Aınıtdınova osy dodada jekeleı synda shırek fınalǵa deıin jetti.
Eske sala keteıik, budan buryn Qazaqstan quramasynyń alǵash ret Bıllı Djın Kıng kýbogynyń fınaldyq kezeńine shyqqanyn, Qazaqstan – Germanııa matchynyń márege jetkenin jazǵan bolatynbyz.
Sondaı-aq Elena Rybakına qazaqstandyqtardyń kýbog fınalyna shyǵýyna qatysty pikir bildire kele, bul tennısshilerimizdiń tarıhı jeńisi ekenin aıtty.
