Qazaqstandyq tennısshi Slovakııadaǵy týrnırde jeńimpaz atandy
ASTANA. QazAqparat - Qazaqstandyq Aleksandr Nedovesov juptyq synda Bratıslava qalasynda (Slovakııa) ótken Peugeot Slovak Open chellendjer týrnıriniń jeńimpazy atandy, dep habarlaıdy QazAqparat tilshisi.
Qazaqstan tennıs federatsııasynan málim etkendeı, qazaqstandyq tennısshi ýkraınalyq Denıs Molchanovpen birge júlde qory 68 myńdaı eýroǵa baǵalanǵan jarysta úzdik shyqty.
Dodanyń úshinshi raketkasy bolyp tirkelgen qazaqstandyq-ýkraınalyq jup fınalda chehııalyqtar Petr Noza - Andreı Polsondy 4:6, 6:4, 10:6 esebimen tize búktirdi.
Osylaısha A.Nedovesov óziniń sport jolynda chellendjer týrnırlerinde 25-tıtýlyna qol jetkizdi.
Sonyń úsheýin jekeleı, 22-sin juptyq synda jeńip aldy.
Ótken jyl Nedovesov úshin asa tabysty boldy, ol jeti ret chempıon atandy. Bul - onyń jeke rekordy.
Eske sala keteıik, budan buryn qazaqstandyq jas tennısshilerdiń Óskemendegi týrnırde tabysty óner kórsetkenin jazǵan bolatynbyz.
